عاوزة طريقة عمل البونشو ده

اهلا وسهلا بيكى gana 22
بالنسبه لاستفسارك احنا ردينا عليكى بالفعل فى موضوعك القديم واللى مكنش فيه صور

http://www.lahlooba.com/forum/viewtopic.php?f=80&t=4463

والحمد لله فى موضوعك ده الصور ظهرت بالفعل

ولكن انتى حاطه موديلين مختلفين تماما
بس كل اللى اقدر اقولهولك عند عمل اى موديل ملهوش مقاسات او ملهوش تعليمات وعاوزه تعرفى مقاسك المظبوط هتجيبى الخيط اللى هتشتغلى بيه سواء كان سميك او رفيع وهتشتغلى عينه منه من 10 غرز ×10 سطور وقيسى العينه دى بالمسطرة وهنفترض انها طلعت 5 سم×5 سم
يبقا النتيجه عندك ان كل 10 غرز بتشتغليهم بالخيط بتاعك بيعملوا 5 سم

وعلى هذا الاساس هتشتغلى

يعنى هتاخدى مقاسك وليكن هتعملى البونشو الاول هتاخدى مقاس دوران الهانش هنفترض انه طلع 100 سم وانتى عاوزه توسعى البونشو شويه من تحت يبقا نخليه مثلا 120 سم

طيب يبقا المطلوب دلوقتى تبدأى على كام غرزة

احنا قلنا كل 10 غرز=5سم
يبقا 240غرزة=120سم

وخدى بالك لو هتشتغلى الوش لوحده والظهر لوحده يبقا هتقسمى الرقم ده على 2 يعنى هتبداى على 120غرزة

اتمنى اكون افدتك وبالتوفيق ان شاء الله

اهلا وسهلا بيكى gana22
نورتى المنتدى
بصى ياقمر بالنسبه للبدايه انا قولتلك ازاى تحددى عدد الغرز واعتقد انه هيبقا قليل يعنى لو هتعوزيه يبقا واسع من تحت كدا زى الموديل يبقا على الاقل تبداى ب 150 غرزة وهتنقصى بالتدريج طول مانتى طالعه لحد ماتوصلى للرقبه

خدى بالك التنقيصات عندك مش هيبقا من الجنب ولكن هيكون فى وسط السطر

قبل ما اقولك على التنقيص انتى هتشتغلى زى مانتى مقسمه يعنى مقلوب ولكن هتفصلى بين الغرز المقلوبه بغرزتين عدل لان انتى عندك فى الصورة كورتين فوق بعض بميل هتعملى واحده فى السطر الاول مثلا فى اول غرزة عدله
ثم هتعملى الكورة التانيه فى السطر التالى فى الغرزة العدلة التانيه هتديكى الشكل اللى فى الصورة ده

نرجع للتنقيص بقا

هنفترض انك هتبداى على 152 غرزة يبقا هتعملى 20 غرزة مقلوبه وغرزتين عدل وهكذا هتلاقى عندك 6 عماويد للكور
عندما يصل الطول الى 7سم هتبداى تنقصى 12 غرزة على مدار السطر (هتنقصى غرزة على جانبى الغرزتين العدل)وهتكررى التنقيص كل 7سم 6مرات كمان
هيصبح عندك عددالغرز فى النهايه 68 غرزة
وطريقة التنقيص دى هيا اللى بتديكى شكل القصات

لاحظى انك هتحردى للكم عندما يصل الطول الى 42 سم

هتشتغلى الكم بنفس الطريقه

ولمل تنتهى من الكمين والوش والظهر هتحطى كل الغرز على ابره دائرية واحده وتشتغلى الكوله2ع,2م
وانا شايفه الكولة مفتوحه من الجنب يبقا ممكن تشتغليها على ابر عادية وتبداى السطر من الجنب

اتمنى اكون افدتك واى استفسار انا فى الخدمه

الشغل جميل وصحيح

طيب المشكلة عندك دلوقتى فى البدايه حددى انتى البدايه ممكن تشتغلى سطرين مقلوبين كتجربة وتقيسى عليها وعلى فكرة الموديل اللى انتى مختاراه لازم يبقا واسع شويا من تحت عشان هتنقصى طول مانتى طالعه فلازم تعملى حساب التنقيصات اللى هتعمليها والا هيبقا ضيق من فوق

الشكر لله حبيبتى
انا تحت امرك فى اى استفسار