قفاز تريكو للأطفال بالباترون والشرح بالعربى

بسم الله الرحمن الرحيم

قفاز تريكو للأطفال بالباترون والشرح بالعربى

هنا شكل القفاز



المقاس حسب السن = 3/5 _ 6/9 _ 10/14 سنوات

........

المواد المطلوبة
_ 200 جرام من الصوف الجنجاه
_ إبر تريكو مدببة الطرفين مقاس 4.5 و 5 مللى

........

قياس الوحدة= 10×10 سم= 17 غرزة×22 سطر

خطوات عمل القفاز

(القفاز اليمين)

_ هنبدأ بعمل 28_32_36 غرزة على الابر مقاس 4.5 مللى

_ هنشتغل دائرى هنشتغل سطر عدل ثم سطر مقلوب

_ هنستمر بعمل البليسيه(2ع,2م) حتى يصل الطول الى 7_7_8 سم

_ هنبدل الى الابر مقاس 5 مللى وهنستمر بعمل غرزة الجيرسيه وفى نفس الوقت فى اول سطر هنقص 6 غرز بالتساوى على مدار السطر
سيصبح عدد الغرز بعد التنقيص= 22_26_30 غرزة

_ عندما يصل الطول الى 1_1_2 سم من بداية الجيرسيه هنبدأ نزود لعمل إصبع الإبهام كالتالى هنزود غرزة فى اول وثالث غرزة على السطر (بمعنى هنزود غرزتين)

_ هنكرر التزويد كل سطرين 2_2_3 مرات (الان عندنا 7_7_9 غرز لإصبع الإبهام)

_ عندما يصل الطول الى 4_4_5 سم هنسلت 7_7_9 غرز لإصبع الإبهام على ماسك الغرز

_ هننشأ غرزة خلف غرز الاصبع المسلوته ليصبح عدد الغرز على الابرة الان= 22_26_30 غرزة هنستمر بالشغل الدائرى وعمل غرزة الجيرسيه وعندما يصل الطول الى 8_9_11 سم هنضع علامتين الاولى فى اول السطر والثانية بعد 11_13_15 غرزة

_ فى نفس الوقت هنقص غرزة على جانبى كل علامة(ككل هنقص 4 غرز فى السطر)
هنكرر التنقيص كل سطرين مرتين ثم كل سطر 1_2_3 مرات
سيتبقى على الابرة بعد التنقيص 6 غرز

_ سنقطع الخيط ونمرره خلال الست غرز المتبقية ونربطه جيدا
سيصبح طول القفاز الكلى= 18_20_23 سم

.......

اصبع الابهام

_ هنعيد 7_7_9 غرز المسلوته الى الابر مدببةة الطرفين مقاس 5 مللى وهنلقط من خلفهم 3 غرز
ليصبح عدد الغرز= 10_10_12 غرزة

_ هنشتغل دائرى غرزة الجيرسيه حتى يصل طول الاصبع الى 3.5_4.5_5.5 سم ثم هنشتغل 2ع معا فوق كل الغرز ثم هنقطع الخيط ونمرره خلال الست غرز المتبقية ونربطه جيدا

......

(القفاز الشمال)

_ نفس خطوات عمل القفاز اليمين مع فارق واحد وهو التزويد لاصبع الابهام هيكون على جانبى الغرزة قبل الاخيرة فى السطر

.....

هنعمل 4 بومبوم قطرهم حوالى 3 سم

وهنربط كل اتنين بومبوم فى كل قفاز من ناحية الخارج فى الفاصل بين البليسيه والجيرسيه

...........

وبكدا نكون بحمد الله انتهينا من شرح القفاز
اتمنى لكم المتعه والفائدة
وتحت امركم فى اى استفسار

وهنا نستعرض بعض التطبيقات للقفاز مع بعض الاضافات والتغيرات