باترون بلوفر تريكو سبورت للأولاد بسوستة بالشرح كامل بالعربى

السلام عليكم ورحمة الله تعالى وبركاته

باترون بلوفر تريكو سبورت للأولاد بسوستة بالشرح كامل بالعربى

ده شكل البلوفر



(المقاس)
2_4_6_8_10 سنوات

(المواد المطلوبة)
_خيط صوف كالتالى

250_300_400_450_500 جرام من اللون الكاكى

50_50_100_100_100 جرام من اللون البنى

50_50_50_50_50 جرام من اللون البرتقالى

_إبر تريكو مدببة مقاس 4 و 4.5 مللى

_علامات

_مشبك

_سوستة طولها 30_35_40_40_45 سم

_إبرة إيتامين

(باترون الجاكار)
تداخل الألوان

_فى اساور الأكمام كالتالى
3 سطور بنى ثم سطرين برتقالى ثم 4 سطور بنى

_ فى بليسيه الظهر والأكمام وبرواز الرقبة كالتالى
سطرين بنى ثم سطرين برتقالى ثم 3 سطور بنى

_ فى الكم اليمين كالتالى
هنشتغل 16_28_40_46_56 سطر باللون الكاكى
ثم 4 سطور برتقالى
ثم 10 سطور بنى
ثم 4 سطور برتقالى
ثم نكمل باللون الكاكى حتى أخر الكم

فى الرسم التالى باترون الجاكار للرقم 04



وفى الرسم التالى شكل تخطيطى للبلوفر يوضح القياسات النهائية لأجزاء البلوفر بالسنتيميتر

(الخطوات)
أولا
الظهر

_هنبدأ بعمل 58_66_70_74_78 غرزة على الإبر مقاس 4 مللى باللون البنى
_هنشتغل البليسيه (2ع,2م) مع عمل الجاكار كما موضح فى أول الموضوع
_حتى يصل طول البليسيه 3سم (7 سطور)
_هنشتغل السطر التالى مقلوب بإستخدام اللون الكاكى وفى نفس الوقت هنقص 1_3_1_3_1 غرزة موزعين على مدار السطر(الأرقام السابقه لكل مقاس يعنى مثلا المقاس الاول هنقص غرزة واحدة وهكذا)

_سيصبح عدد الغرز بعد التنقيص = 57_63_69_71_77 غرزة
_هنستمر بعمل غرزة الجرسيه مع تبديل الابر بالمقاس 4.5

_عندما يصل الطول إلى 15_17_19_21_24 سم او بعد شغل 38_42_48_52_60 سطر هنبدأ نقفل عشان حردة الباط كالتالى من كل ناحية فى بداية كل سطر
غرزتين / مرتين
غرزة / مرة

_عدد الغرز بعد التنقيص = 47_53_59_61_67 غرزة

_هنستمر بعمل غرزة الجرسيه وعندما يصل الطول إلى 28_32_36_39_43 سم او بعد شغل 70_80_90_98_108 سطر هنبدأ نقفل عشان حردة الكتف من كل ناحية كالتالى

للمقاس الأول
3غرز/3مرات
4غرز/مرة واحدة

للمقاس الثانى
3غرز/مرة واحدة
4غرز/3مرات

للمقاس الثالث
4غرز/3مرات
5غرز/مرةواحدة

للمقاس الرابع
4غرز/3مرات
5غرز/مرةواحدة

للمقاس الخامس
5غرز/4مرات

_فى نفس الوقت هنقفل عشان حردة الرقبة كالتالى
هنقفل 9_11_13_15_15 غرزة فى المنتصف
ثم نكمل كل ناحية منفصلة
هنستمر بالتقفيل ناحية الرقبه فى اول كل سطر هنقفل 3 غرز / مرتين

وبكدا نكون خلصنا شرح الظهر

ثانيا
الجزء الأمامى اليمين

_هنبدأ بعمل 31_35_39_39_43 غرزة بإستخدام الإبر مقاس 4 واللون الكاكى
_هنشتغل البليسيه(2ع,2م)مع عمل باترون الجاكار حتى يصل الطول الى 3 سم (7سطور)
_هنشتغل السطر التالى مقلوب باستخدام اللون الكاكى وفى نفس الوقت هنقص صفر_1_2_1_2 غرزة بالتساوى على مدار السطر
_سيصبح عدد الغرز بعد التنقيص = 31_34_37_38_41 غرزة
_هنستمر بعمل غرزة الجرسيه مع استبدال الإبر بالمقاس 4.5 مللى

_عندما يصل الطول إلى 3_4_6_6_7 سم او بعد شغل 8_10_16_16_18 سطر من نهاية البليسيه هنشتغل 24_27_30_31_34 غرزة ناحية السوستة هيتبقى 7 غرز ناحية الجانب نضعهم على ماسك غرز مؤقتا (وبنعمل كدا عشان الجيب)

_هنبدأ نقفل عشان حردة الجيب كالتالى
كل سطرين هنقفل 3غرز / مرتين ثم غرزتين / مرة واحدة ثم غرزة / 3مرات
ثم بعد 4 سطور هنقفل غرزة مرة واحدة
ثم بعد 6 سطور هنقفل غرزة مرة واحدة

_سيتبقى بعد التقفيل = 11_14_17_18_21 غرزة
_هنستمر فى عمل الجيرسيه وعندما يصل الطول الى 13_14_16_16_17 سم او بعد شغل 32_34_40_40_42 سطر من نهاية البليسيه هنترك الغرز المتبقية على ماسك الغرز مؤقتا

_نعود مرة أخرى للأسفل لعمل بطانة الجيبب بإستخدام الابرة مقاس 4.5 مللى وباللون الكاكى هنبدأ بعمل 24_27_30_31_34 غرزة ونشتغل غرزة الجيرسيه حتى يصل الطول الى 3_4_6_6_7 سم او بعد شغل 8_10_16_16_18 سطر هنضم ال 7 غرز اللى كنا حاطينهم على ماسك الغرز فى الاول

_اصبح الان على السنارة 31_34_37_38_41 غرزة
_هنستمر فى عمل غرزة الجيرسيه وعندما يصل الطول الى 13_14_16_16_17 سم او بعد شغل 32_34_40_40_42 سطر من ضم السبع غرز هنقفل بطانة الجيب مع الجيب كالتالى

هنشتغل كل غرزة من الجيب مع كل غرزة من بطانة الجيب معا حتى ننتهى من تقفيل الجيب ونكمل باقى غرز السطر عادى
_هنستمر فى عمل غرزة الجيرسية حتى يصل الطول الى 15_17_19_21_24 سم او بعد شغل 38_42_48_52_60 سطر هنبدأ نقفل عشان حردة الباط كل سطرين من الجنب كالتالى
غرزتين/مرتين
غرزة/مرة

_بعد التقفيل سيتبقى 26_29_32_33_36 غرزة
_هنستمر فى شغل الجيرسيه حتى يصل الطول الى 25_29_32_35_39 سم او بعد شغل 62_72_80_88_98 سطر هنبدا نقفل عشان حردة الرقبة كل سطرين من ناحية الرقبة كالتالى

للمقاس الأول
6غرز/مرة
3غرز/مرة
غرزتين/مرة
غرزة/مرتين

للمقاس الثانى
7غرز/مرة
3غرز/مرة
غرزتين/مرة
غرزة/مرتين

للمقاس الثالث
7غرز/مرة
3غرز/مرة
غرزتين/مرة
غرزة/3مرات

للمقاس الرابع والخامس
8غرز/مرة
3غرز/مرة
غرزتين/مرة
غرزة/3مرات

_فى نفس الوقت عندما يصل الطول الى 28_32_36_39_43 سم او بعد شغل 70_80_90_98_108 سطر هنبدأ نقفل عشان حردة الكتف كل سطرين من ناحية الكم كالتالى

للمقاس الأول
3غرز/3مرات
4غرز/مرة

للمقاس الثانى
3غرز/مرة
4غرز/3مرات

للمقاس الثالث
4غرز/3مرات
5غرز/مرة واحدة

للمقاس الرابع
4غرز/3مرات
5غرز/مرة واحدة

للمقاس الخامس
5غرز/4مرات

_هنشتغل الجزء الامامى الشمال كما سبق ولكن عندما نصل الى 15_18_21_24_28 سم او بعد شغل 38_44_52_60_70سطر من نهاية البليسيه
هنبدا فى شغل الجاكار للرقم 04 لمدة 20 سطر ثم نكمل كما سبق شرحه فى الجزء الامامى اليمين

وبكدا نكون انتهينا من الجزء الأمامى

رابعا
الكم الشمال

_هنبدأ بعمل 34_38_38_42_42 غرزة على الابر مقاس 4 باستخدام اللون البنى
_هنشتغل البليسيه(2ع,2م)مع عمل باترون الجاكار حتى يصل الطول الى 4سم(9 سطور)
_هنشتغل سطر مقلوب باللون الكاكى وفى نفس الوقت هنقص صفر_2_صفر_2_صفر غرزة بالتساوى على مدار السطر
_سيصبح عدد الغرز بعد التنقيص = 34_36_38_40_42 غرزة

_هنستمر فى عمل غرزة الجيرسيه مع تبديل الابر بالمقاس 4.5 مللى
_ثم هنبدا نزود من كل جانب كالتالى
للمقاس الاول
بعد 8 سطور هنزود غرزة /مرة ثم كل 6 سطور هنزود غرزة /4مرات

للمقاس الثانى
كل 6سطور هنزود غرزة/7مرات ثم بعد 4 سطور هنزود غرزة/مرة

للمقاس الثالث
كل 6سطور هنزود غرزة/9مرات ثم بعد 4 سطور هنزود غرزة/مرة

للمقاس الرابع
كل 6سطور هنزود غرزة/11 مرة

للمقاس الخامس
كل 8سطور هنزود غرزة/4مرات ثم كل 6 سطور هنزود غرزة/7مرات

_سيصبح عدد الغرز بعد جميع التزويدات = 44_52_58_62_64 غرزة
_عندما يصل الطول الى 15.5_20_24.5_28.5_32 سم او بعد شغل 38_50_62_70_80 سطر هنبدأ نقفل من كل جانب كل سطرين عشان قبة الكم كالتالى
للمقاس الاول
3غرز/مرة
2غرزة/مرة
غرزة/5مرات
2غرزة/مرة
3غرز/مرة

للمقاس الثانى
3غرز/مرتين
2غرزة/مرة
غرزة/3مرات
2غرزة/مرة
3غرز/مرتين

للمقاس الثالث
4غرز/مرة
3غرز/مرة
2غرزة/مرتين
غرزة/مرتين
2غرزة/مرة
3غرزة/مرة
4غرز/مرة

للمقاس الرابع
4غرز/مرة
3غرز/مرة
2غرزة/5مرات
3غرز/مرة
4غرز/مرة

للمقاس الخامس
4غرز/مرة
3غرز/مرتين
2غرزة/3مرات
3غرز/3مرات

_عندما يصل الطول الى 22.5_27_31.5_35.5_39 سم او بعد شغل 56_68_80_88_98 سطر من نهاية البليسيه هنقفل ال14 غرزة المتبقيين

الكم اليمين زى الشمال مع عمل باترون الجاكار

وبكدا نكون إنتهينا من الأكمام

برواز الرقبة

_هنبدأ بعمل 68_72_80_84_88 غرزة باللون البنى وبالابر مقاس 4 مللى
_هنشتغل البليسيه(2ع,2م)مع الجاكار حتى يصل الطول الى 3سم (7سطور) ثم هنشتغل سطر مقلوب باللون الكاكى


برواز الجيب

_هنبدأ بعمل28 غرزة باللون البنى وبالابر مقاس 4 مللى
_هنشتغل البليسيه(2ع,2م)مع الجاكار حتى يصل الطول الى 3سم (6سطور) ثم هنشتغل سطر مقلوب باللون الكاكى

التقفيل
_هنخيط الاكتاف والجوانب والاكمام ثم نركب الاكمام فى البلوفر
_هنخيط برواز الرقبة ونخيط بروازى الجيب مع تثبيت قاعدة وقمة برواز الجيب فى البلوفر
_هنركب السوستة على طول البرواز الامامى مع ترك 1.5 سم من فوق ومن ـحت
_هنطرز على جانبى السوستة باستخدام ابرة الايتامين والخيط البنى بعمل خطوط كما فى الصورة بحيث يعبر الخيط فوق 3 او 4 سطور ويمر من تحت سطرين

تم بحمد الله الانتهاء من الشرح والترجمة
اتمنى لكم الفائدة واى استفسار انا تحت امركم

يسلملى ذوقك ياجميل واى حاجة مش واضحة انا تحت امرك

انا هفترض معاكى انك بتشتغلى على المقاس الاول
عندما يصل الطول الى 3 سم او بعد شغل 8 سطور من نهاية البليسيه هتشتغلى كالتالى

السطر الاول (ظهر العمل)= 24 غرزة مقلوب ناحية السوسته ثم هيتبقا 7 غرز ناحية الجانب هنسلتهم بدون شغل على ماسك الغرز تمام كدا
هتلفى الشغل وتبداى تشتغلى فوق 24 غرزة كالتالى
السطر الثانى= هنقفل 3غرز ,باقى الغرز عدل
السطر الثالث= مقلوب
السطر الرابع= هنقفل 3غرز ,باقى الغرز عدل
السطر الخامس= مقلوب
السطر السادس= هنقفل غرزتين, باقى الغرز عدل
السطر السابع= مقلوب
السطر الثامن= هنقفل غرزة,باقى الغرز عدل
السطر التسع= مقلوب
السطر العاشر= هنقفل غرزة,باقى الغرز عدل
السطر11= مقلوب
السطر12= هنقفل غرزة,باقى الغرز عدل
السطر13=مقلوب
السطر14=عدل
السطر15=مقلوب
السطر16= هنقفل غرزة,باقى الغرز عدل
السطر17= مقلوب
السطر18= عدل
السطر19= مقلوب
السطر20= عدل
السطر21= مقلوب
السطر22= هنقفل غرزة,باقى الغرز عدل

التقفيل بيبقا فى اول السطور العدلة ناحية الجنب عشان تعملى حردة الجيب زى مافى الصورة كدا لو بصيتى فيها هتلاقى حردة الجيب ناحية الجنب مش ممكن تبقا ناحية السوستة

الجيب بقا لما تنزلى لتحت هتلقطى من بعد الكمر على طول وتشتغلى لحد ماتوصلى لل 7 غرز اللى مركونين وترجعيهم للابرة تانى وتشتغلى كل الغرز

اتمنى الصورة تكون وصلت وانا تحت امرك فى اى استفسار