طريقة عمل الجلاش محشى مهلبية وهو سهل اوى وسريع مش بياخد وقت وطعمه لذيذ
المقادير
لفه جلاش
مهلبيه تكون جاهزه قبلها بشويه وبارده وطبعا كلكم اساتذه
سمن او زبده زى ماتحبى
شربات لاخفيف اوى ولا تقيل
الطريقة
اول حاجه هنفرد لفه الجلاش كلها زى ماهى على الرخامه
ونقطعها مربعات اللفه كلها على بعضها
حاولى على اد ماتقدرى تخليها مربعات عشان يبقى شكلها حلو فى التقديم
وهنا بقى ناخد مربع كامل (اللطبقات كلها )ونقسمهم اتنين بالنظر كده
يعنى لو عدد الورق 20 ورقه مثلا تاخدى هنا 10 وهنا 10 طبعا احنا مش هنقعد نعد بالنظر كده
وتقفلى المربع على بعضه كده بالشكل ده شوفتى بسيطه ازااى
متخاافيش مش هيفتح ولا يفك ولا المهلبيه هتقع ولا اى حاجه
وتبدأى ترصى الصوانى بتاعتك كده
وبعدين هنسيح السمن او الزبد انا مبحبش اسخنها بحطها زى مانتو شايفين كده فى كوبايه استيل واحط الكوبايه
فى حمام ماء ساااخن جداا هتلاقيها ساحت وبقت زى الفل
هنيجى على كل واحده ونحط عليها ملعقه كبيره سمنه بس مش مليانه اوى يدوب كده توزعى عليها بالمعلقه
هنا بعد ماخلصنا الكميه كلها
انا بعد مابخلص كده بجيب الفرشه اللى بندهن بيها الصوانى واخد من السمن اللى فى ارضيه الصينيه وادهن الجلاش تانى بيها
لو مستعجله خلاص بالمعلقه كفايه
وسيبيهم شويه كده على جنب وسخنى الفرن على 200 بعد مالفرن سخن كويس دخليهم بقى
بالنسبه للفرن الكهربا بدخله على الرف اللى فوق السخان مباشره واشغل فوق وتحت والمروحه مش بياخد وقت بيحمر فى 20 دقيقه تقريبا
اما فرن البوتوجاز على 200 برده بس فى الرف اللى فى النص وولعى تحت بس من غير الشوايه هو بيحمر من فوق وتحت وكل واحده برده على حسب فرنها بس خدو بالكم لانه بيستوى بسرعه اوى ولازم تتابعى كويس عشان ميتحرقش منك فى اول مره بعد كده هتعرفى التوقيت بتاعه
هنا خلاص بقى لونه جميل اوى اول مانطلعه هنسقيه بالشربات وهو فى مكانه باستخدام المعلقه برده كل واحده بحط عليها معلقه شربات بارد
ملعقه واحده بس كل واحده بقى وراحتها بس خدى بالك انه محشى مهلبيه مسكر يعنى
وفى نفس ذات الوقت بعد الشربات مباشره على طول يعنى ترشى جوز الهند بس لازم فى وقتها كده عشان يلزق كويس على الجلاش مش كل اللى يمسك واحده يوقع جوز هند
وسيبيه بقى بعد كده 5 دقايق بالكتير وانقليه لطبق التقديم ودخليه التلاجه (على فكره طعمه وهو سخن جميل اوى ياسلام على المهلبيه وهى سايحه جوه كده ومسقيه شربات وغرقانه جوز هند )بس طبعا لازم يتقدم للضيوف بعد مايبرد
وكل واحده بقى تتفنن فى التقديم بالصوره اللى تعجبها
لا تستطيع كتابة مواضيع جديدة في هذا المنتدى لا تستطيع كتابة ردود في هذا المنتدى لا تستطيع تعديل مشاركاتك في هذا المنتدى لا تستطيع حذف مشاركاتك في هذا المنتدى لا تستطيع إرفاق ملف في هذا المنتدى
