عنوان المشاركة: Re: عايزة اعرف ازاى اعمل مكرونة بشاميل
مرسل: الخميس ديسمبر 08, 2011 7:53 pm
عضو
اشترك في: الخميس إبريل 21, 2011 10:29 pm
مشاركات: 56
انا تحت أمرك طبعا هاقولك على طريقة سهلة جدا ومضمونة هاتي الخلاط وحطي فيه 3 ملاعق دقيق و2 كوب لبن ( أو 6 ملعقة لبن بودرة و2 كوب ماء ) وهوب إضربي ده في الخلاط كويس - وبعدين حطيه على النار مع قطعة زبدة صغيرة أو 2 ملعقة سمن واستمري في التقليب عشان مايكلكعش - وأكيد تكوني عاملة العصاج ( بصل مقطع صغير مع اللحم المفروم مع ملعقة سمن أو زيت وعلى البارد كله على بعض على النار مع ملح وفلفل أسود لغاية ما تتشرب ميتها وتزودي ربع كوب ماء وتسبيها لغاية ما تشرب وتشكشك تاني ) خليكي معايا يبقى دلوقت عملنا الباشميل وكمان عملنا العصاج -- فاضل تسلقي كيس المكرونة مع زيت وملح بس إوعي تهريها . وتصفيها في المصفاة يلا بقى هنطبق الصينية --- حطي المكرونة في الحلة اللي سلقتيها فيها ( عشان منكترش المواعين ) وحطي على المكرونة 3 ملاعقة باشميل و ملعقة سمن أو زيت وملح وفلفل أسود وقلبيهم ( من غير نار ) - وهاتي الصينية وحطي نص المكرونة وبعدين العصاج وبعدين باقي المكرونة وبعدين باقي الباشميل وممكن ملعقة سمن على الوش وعلى الفرن على طول على الرف الوسطاني لغاية ما الجوانب تحمر وممكن هنا تفتحي الشواية من فوق وتكون الصينية بعيد عنها بس إوعي تخرجي من المطبخ وتسيبيها يعني دقيتين بس - وممكن تحطي شوية موتزريلا أو بارميزان على الوش في الآخر تحت الشواية بس قطعيها لما تبرد شوية عشان تكون متماسكة - بالهنا والشفا جربي يا قمر وطمنيني
عنوان المشاركة: Re: عايزة اعرف ازاى اعمل مكرونة بشاميل
مرسل: الخميس ديسمبر 08, 2011 9:55 pm
مراقب عام
اشترك في: الاثنين إبريل 05, 2010 7:23 pm
مشاركات: 13047
مكان: المنصورة
الله تسلم ايديكى وعنيكى راضيه بحكمه بجد فتحتى نفسى وحلوه اوى فكرة الجبنه فوق الوش هجربها ان شاء الله
انا بقا هاقولكوا ازاى بعمل المكرونه الباشاميل
بصى ياجميل انا بعمل 3 حاجات فى وقت واحد الاول بحضر الباشاميل بجيب كيلو لبن وبحطه فى اللبانه او فى حله ستيل وبحط عليه 5ملاعق متوسطه دقيق وشويه ملح صغنتتين بالبركه كدا وبحطه على النار وبقلب كويس قوى بمضرب البيض عشان طبعا ماتكلكعش لحد ما البشاميل يمسك وتشوفى بقابيق بتطلع منه وساعتها تطفى النار وبعدين بجيب بيضتين بحط فى الباشاميل واحده كامله وبياض التانيه وبسيب الصفار بتاع البيضه التانيه عشان هحطه على وش الصينيه وبحط فوق الباشاميل كمان شويه فلفل اسمر ومعلقة سمن كبيرة وبقلب بمضرب البيض كويس وبركن الباشاميل على جنب
تانى حاجه بكون فى نفس الوقت بعمل العصاج بجيب بصله ببشرها وبحطها فى حله تيفال وبعد كدا احط فوقها معلقه سمن واشوحها على النار واحط فوقهم اللحمه المفرومه واهدى النار خالص لحد مااللحمه تستوى احطلها الملح ورشه فلفل واركنها على جنب
تالت حاجه بسلق المكرونه بغلى مايه وفيها نقطتين زيت وبسقط فيها 400 جرام او كيس مكرونه ونقلبها كل شويه عشان ماتلزقش فى بعضها لحد ماتستوى بصفيها فى المصفاه وارجعها تانى للحله وبحط عليها نص كمية البشاميل واقلبها كويس بالمعلقه الخشب
فى اللحظه دى بولع الفرن واضبطه على درجة حرارة 200
نيجى بقا لتحضير الصينيه بدهنها كويس بالزيت او السمنه السايحه وبدهن الجوانب كويس بعد كدا بصب نص كمية المكرونه وبعدين بحط اللحمه المعصجه وبعدين بحط باقى المكرونه بعد كدا بحط الصفارة المتبقيه على كمية الباشاميل اللى فاضله واقلبها كويس واصبها فوق الوش وبحطها فى الفرن فى الرف اللى فى النص وبتاخد معايا حوالى نص ساعه بس انتى راقبيها لحد ما الوش يبدا يحمر وانا مش بشغل الشوايه لان الفرن بتاعى بيحمر الوش من غير شوايه وممكن انتى تشغلى الشوايه عشان تدى الوش لون وبالهنا والشفا
لا تستطيع كتابة مواضيع جديدة في هذا المنتدى لا تستطيع كتابة ردود في هذا المنتدى لا تستطيع تعديل مشاركاتك في هذا المنتدى لا تستطيع حذف مشاركاتك في هذا المنتدى لا تستطيع إرفاق ملف في هذا المنتدى
