الدرس الأول البداية (CASTING ON)

بسم الله الرحمن الرحيم

الطريقة الأولى

طريقة الغرزة العدله
(knitted cast on),(knitting on),(Knit cast on)



ودى الطريقة الأساسية وتعتبر اسهل طريقة ومهمة كمان عشان نتعلم بالمرة إزاى نعمل الغرزة العدلة.

بعد ماحطينا غرزة البداية على السنارة كالتالى




هنمسك السنارة اللى عليها غرزة البداية باليد الشمال وهنمسك السنارة التانية باليد اليمين وبعدين هندخل راس السنارة اليمين فى غرزة البداية من قدام لورا وفى نفس الوقت من تحت السنارة الشمال زى ماموضح فى الرسمة



وهنمسك السنارة اليمين بالشكل ده



بعد كدا هنلف الخيط على الصباع اليمين



وهنلف الخيط على السنارة اليمين زى مافى الرسمة



بعد كدا هنسحب الخيط من خلال غرزة البداية بإستخدام رأس السنارة اليمين


هنلاقى ان فيه غرزة جديدة إتكونت عندنا هنحطها على السنارة الشمال ونسحب السنارة اليمين



بعد كدا هنشد الخيط براحة عشان نضبط الغرزة الجديدة على السنارة دلوقتى اصبح عندنا غرزتين على السنارة بما فيهم غرزة البداية

بسم الله الرحمن الرحيم

الطريقة التانية

طريقة الذيل الطويل
(Long-Tail Cast On)
وتعرف أيضا بإسم
(Double Cast-On or Continental Cast-On or sling shot, two-strand, Y cast on)

وهى من اجمل وانسب طرق البداية ومناسبة جدا لعمل الجرسيه والبليسيه فهى
1- تجعل العمل ذو حافة مرنة
2- سهلة عند لقط الغرز
3- هذه البداية تعد بعد كده على انها سطر تريكو مع انه لا يعد بالباترونات ولا يؤخذ فى الحسبان
4- كما ان الشغل بالسطر الاول بعد كدة بيكون سهل وبمجرد انك تتعلميها بتبقى اسرع معاكى من الطريقةالاولى

طبعا زى أى طريقة فى البداية هنعمل غرزة البداية ولكن مع مراعاة إننا هنسيب جزء طويل من الخيطوعلى حسب عدد الغرز بنقدر طول الخيط المتروك وده سبب تسميتها بطريقة الذيل الطويل
الغرز هتتكون بإستخدام الذيل ده مع الناحية التانية من الخيط المتصل بالبكرة
هنمسك السنارة باليد اليمين




يمسك الخيط باليد الشمال ويحمل على اصبعيك السبابة والابهام على ان يكون الخيط المتروك لعمل الغرز على اصبع الابهام و الطرف الاخر المتصل بالشلة على اصبع السبابة ثم تجمع الطرفين وتمسك بباقى اصابعك ليتتدلو للاسفل



قومى ببسط اصبعيكى الابهام و السبابة وادخلى الابرة بينهما من اسفلهم وشدى الخيط بالابرة اصبح الان على الابهام لفة او دائرة من الخيط وكذلك على السبابة




ادخلى الابرة من اسفل الابهام من جهة اليسار لتصبح فى منتصف لفة الخيط يعنى ادخلناها من اسفل لاعلى




قومى الان بادخال الابرة من اعلى داخل اللفة اللى على السبابة



واسحبى الخيط من السبابة واخرجيه من الابهام

بسم الله الرحمن الرحيم

الطريقة الثالثة

طريقة الضفيرة
(Cable Cast On)

الطريقة دى سهلة ولكن من عيوبها إن الشغل من تحت مش بيكون مطاط .
الطريقة دى بتستخدم أيضا فى تزويد الغرز فى وسط الشغل وده هنشرحه بعد كدا بإذن الله.




زى أى طريقة هنعمل غرزة البداية ونحطها على السنارة(الغرزة دى بتتحسب من ضمن الغرز)
الطريقة دى مش محتاجين إننا نسيب جزء من الخيط زى ماعملنا فى طريقة الذيل الطويل.




عشان نعمل الغرزة التالية هنحط السنارة التانية فى قلب غرزة البداية ونلف الخيط عليها ونسحب الخيط من داخل غرزة البداية (بالضبط كأننا بنشتغل غرزة عدلة).




هننقل الغرزة اللى إتكونت دى على السنارة الشمال ونسحب السنارة اليمين ونشد الخيط براحة.




عشان نعمل الغرزة التالتة وباقى الغرز اللى بعد كدا هنحط السنارة اليمين فى المسافة اللى بين الغرزتين الموجودين على السنارة الشمال .




هنلف الخيط حول السنارة اليمين ونسحبه من بين الغرزتين




ونحطه على السنارة الشمال بإستخدام السنارة اليمين ونسحب السنارة اليمين




هنشتغل باقى الغرز بنفس الطريقة السابقة


شوفى برضه الرسم التوضيحى المبسط ده









تابعونى

بسم الله الرحمن الرحيم

الطريقة الرابعة
طريقة الغرزة البسيطة
(wrap cast on)
(loop cast on, e-wrap cast on, single cast on)

هذه الطرق هى أبسط الطرق ولكن من عيوبها إن شكل العمل من تحت بيبقا مش منتظم قوى وبيبقا مطاط زيادة عن اللزوم.

كالعادة طبعا هنعمل غرزة البداية ونمسك السنارة باليد اليمين ونمسك الخيط باليد الشمال ونشده عشان نثبت غرزة البداية على السنارة.



هنلف الخيط حول الابهام ونمسك طرفه بباقى الاصابع زى ما موضح بالصورة



هندخل الابرة من تحت الخيط زى ما فى الصورة



إسلتى الخيط من إيدك وشدية بقوة عشان تثبتى الغرزة على السنارة



كررى الخطوات حتى تحصلى على العدد المطلوب من الغرز

بسم الله الرحمن الرحيم

الطريقة الخامسة
الطريقة المحترفة أو الغير مرئية
(Invisible (Provisional) Cast-On)
أيضا تسمى
(Looped Cast-On)

هذة الطريقة قد تبدو صعبة بس لما تعرفيها وتجربيها هتكتشفى إنها سهلة جدا.
الطريقة دى فكرتها ببساطة إنك بتعملى بداية وهمية عشان ممكن تحتاجى إنك تكملى الشغل بتاعك من تحت فى بعض الباترونات فبدل ماتلقطى الغرز والعمل يبقا شكلة موصول
بنفك البداية الوهمية دى ونكمل الشغل عادى فى عكس الإتجاه وبيبقا شكل العمل مرتب ومنتظم .

الطريقة دى كمان حلوة قوى فى الشال المثلث عشان البداية بتاع الشال بتبقى فى نص العمل وبتشتغلى يمين وترجعى تشتغلى شمال.

أنا مش عاوزاكوا تتخضوا من الكلام لأن التطبيق هيبين الموضوع أسهل من كدا بكتير.

البداية المحترفه دى ليها كذا طريقة هنشرحهم كلهم وإختارى الأسهل ليكى

الطريقة الأولى:
هنستخدم فيها إبرة كروشيه وخيط بلون مختلف عن لون الصوف اللى هنشتغل بيه

هنبدأ بعمل غرزة البداية عادى ولكن هنحطها على إبرة الكروشيه




هنشتغل غرزة السلسة كالتالى وأهى فرصة برضه نتعلمها
هنلف الخيط حول إبرة الكروشيه كما موضح فى الصورة




بإستخدام رأس إبرة الكروشيه هنسحب الخيط من خلال غرزة البداية وبكدا إتكونت عندنا غرزة سلسلة




هنستمر فى عمل غرز السلسلة حتى نصل إلى العدد المطلوب وممكن نعمل بزيادة وفى النهاية هنقص طرف الخيط وندخلة فى أخر غرزة موجودة على إبرة الكروشيه ونعقدة




وده بيسمى السطر الوهمى أو البداية الوهمية اللى هنفكها بعد كدا




هنحط إبرة التريكو فى أول غرزة سلسلة




هنلف الخيط اللى هنستخدمه فى العمل حول إبرة التريكو ونسحبه من خلال غرزة السلسلة هتتكون عندنا غرزة عدلة




هنفضل نحط إبرة التريكو فى كل غرزة سلسلة وننشأ منها غرز عدله كما سبق لحد ما نوصل لعدد الغرز اللى هنبدأ به




لما نحتاج بقا إننا نشتغل من تحت هنشيل السطر الوهمى ده بفك العقدة اللى عملنها فى أخر غرزة سلسلة ونكرها




شوفوا الغرز اللى بانت دى هنلقطها بإبرة التريكو ونشتغلها عادى جدا



.............................................................................................................

الطريقة التانية:

بنستخدم فيها برضة إبرة كروشيه وخيط بلون مختلف

هنعمل غرزة البداية ونحطها على إبرة الكروشيه ونلف الخيط ورا إبرة التريكو زى الصورة




هنلف الخيط حول إبرة الكروشيه




ونسحبه من خلال غرزة البدايه




هنرجع الخيط ورا إبرة التريكو ونكرر الخطوات اللى فاتت لحد مانحصل على عدد الغرز المطلوبة هنقطع الخيط ونمررة خلال أخر غرزة موجودة على إبرة الكروشيه




هنستخدم الخيط اللى هنشتغل بيه ونبدأ سطر عادى بإعتبار إن الغرز الموجودة على السنارة هيا غرز البدايه




فى بعض الباترونات بنحتاج إننا نشتغل من تحت عشان كدا هنشيل سطر البداية الوهمى ده بإننا بنفك العقدة اللى عملنها فى أخر غرزة ونكرها







هنلقط الغرز اللى إتفكت على إبرة تريكو




هيبقا الشكل عندنا عامل كدا



.............................................................................................................

بسم الله الرحمن الرحيم

نكمل طرق البداية المحترفة

الطريقة الثالثة
بدون إبرة كروشية هنعملها بإستخدام الإيد فقط والطريقه دى تشبه طريقة الذيل الطويل

هنربط طرف الخيطين ونمسكهم على السنارة باليد اليمين زى الصورة الخيط الأزرق ده خيط الشغل هنلفه حول الإبهام والخيط الاحمر ده اللى هيكون البداية الوهميه هنلفه حول السبابه



هنلف الخيط الأزرق حول الإبرة زى ما فى الصورة



ونلف رأس الإبره حول الخيط الأحمر عشان نعمل لفة على السنارة ونسحب الخيط الأزرق لقدام وتحت الخيط الأحمر



هنلف رأس الإبره حول الخيط الأزرق ونسحب الخيط الأحمر لفوق



هنكرر الخطوات لحد مانحصل على عدد الغرز المطلوب



وبعد كدا هنشتغل عادى ولما نحتاج نفك البداية الوهميه اللى عملنها دى هنفك العقدة اللى فى الأول ونكرها ونلقط الغرز على سنارة ونشتغل عادى

بسم الله الرحمن الرحيم

الطريقة الرابعة فى البداية المحترفة

بنستخدم فيها الكابل بتاع السنارة الدائرية

هنعمل غرزة البداية ونحطها على إبرة التريكو اللى هنشتغل بيها



هنمسك الإبرة والكابل بتاع الإبرة الدائرية فى اليد اليمين ونمسك الخيط ونلفه على السبابة الشمال وطرف الكابل بالابهام الشمال زى الصورة هتوضح أكتر



هنعمل لفة بالخيط على الإبرة تابعى الصور





هنلف السنارة حول الخيط والكابل تابعى الصور





الخطوتين اللى فاتوا دول عملولنا غرزة واحدة
هنكرر الخطوتين دول لحد مانحصل على عدد الغرز المطلوب
ويفضل إننا نعمل غرز زياده عن المطلوب عشانممكن يتسلت مننا غرز فى بداية الشغل يبقا عندنا غرز احتياطى



الكابل بعد ما خلصنا الغرز هيبقا مبروم على السنارة هنعدله ونستعد للشغل





هنشتغل السطر الأول عادى هتحسى إنه غريب شويا مطاط قوى وواسع بس مع الشغل هيتعدل



هنستمر فى الشغل عادى ولما نحتاج نشتغل من تحت هنشتغل الغرز الموجودة على الكابل



......................................................................................
.............................................................................
....................................................................

وبكدا تم بحمد الله الإنتهاء من طرق البداية المختلفه

ولو ظهر قدامى طريقة جديدة أو فكرة جديدة بإذن الله هشرحها

أتمنى تكونوا إستفدتوا من الموضوع ونتقابل إن شاء الله فى الدرس القادم واللى هيكون عن الغرزتين الأساسيتين فى شغل التريكو كله وهما الغرزة العدلة والغرزة المقلوبه

شكرااا لكى لهلوبه موضوع عظيم جداااا

وننتظر منك المزيد ان شاء الله