ورشة فستان تريكو برسمة جاكار القطة كيتى للأطفال من 6 شهور ل سنه

بسم الله الرحمن الرحيم

ورشة فستان تريكو برسمة جاكار القطة كيتى للأطفال من 6 شهور ل سنه



الفستان ده عملتوا لبنوتى جنى من حوالى 4 سنين

الفستان من تصميمى وتنفيذى والموديل اللى لابساه بنوتى جنى وهيا عندها 7 شهور تقريبا(قولوا ماشاء الله والله أكبر)

طبعا المقاس انا عملته كبير شوية لأن الأطفال فى السن ده بيكبروا بسرعة فالمقاس يناسب من سن 6 شهور لغاية سن سنة

كمان فيه ملاحظة فى شغل الجاكار أنا فى الموديل ده كنت أول مرة أشتغل جاكار بالتطريز ( بمعنى بعد ماخلصت الفستان بدأت أطرز الرسمة على الفستان ) وملاحظاتى فى الطريقة دى كالتالى

مميزاتها :

1/ إنها سهله جدا عن شغل الجاكار أثناء العمل نفسه
2/ بتقدرى تحددى بالظبط وتوسطنى الرسمة على الشغل لانك بتكونى شايفة القطعه مكتملة قدامك قبل ماتطرزيها

عيوبها :

1/ الشغل بيعرض أكثر بعد التطريز والجزء المطرز بيكون سميك عن باقى العمل
2/ بالإضافة الى ان التشطيب وشكل التطريز من ظهر العمل بيكون مش نظيف

وعلى العموم التجربة كانت حلوة وإستفدت طبعا منها ولكن بقيت بفضل شغل الجاكار اثناء العمل برغم انه اصعب ولكن النتيجه بتكون مبهرة أكثر

المواد المستخدمة :



_ 200 جرام من الخيط الأزرق
_ 100 جرام من الخيط الأبيض
_ إبرة تريكو مدببة الطرف مقاس 3.5 مللى و 5.5 مللى
_ إبرة إيتامين (إبرة تطريز) + خيوط تطريز (كوتونبرليه)

........

الخطوات

(أولا)

* الظهر *

_ باللون الأزرق هنبدا بعمل 152 غرزة على الإبر مقاس 3.5 مللى ( هنبدأ على الإبرتين معا ثم هنسحب إبرة ونترك الغرز على الإبرة التانية وبنعمل كده علشان حافة الشغل متكونش مشدودة وكمان علشان تسهل شغل أول سطر )





_ هنشتغل 6 سطور عدل



_ ثم هنضم الخيط الأبيض للشغل وهنبدأ نشتغل غرزة الجيرسيه ( سطر عدل وسطر مقلوب ) هنشتغل 6 سطور باللون الأبيض





_ ثم هنستمر بشغل غرزة الجيرسيه مع عمل سطرين باللون الأزرق و سطرين باللون الأبيض لمدة 42 سطر



_ هنشتغل سطر عدل باللون الأبيض



_ ثم فى السطر التالى هنشتغل باللون الأبيض كل غرزتين 2 مقلوب معا لعمل الكشكشة
سيصبح عدد الغرز = 76 غرزة

_ الان هنبدأ نشتغل البانتى الداخلى ( والبانتى ممكن تستغنى عنه وماتعملهوش بس أنا عملته لأن الأطفال فى السن ده حركتهم كتير وغير كده لسه مابيمشوش فاللبس عامة لو مش ممسوك من تحت بيترفع لفوق زى فكرة السالوبيتات اللى بتكون ضرورية للرضع علشان إحكام غلق اللبس على جسمهم )

_ هناخد طرف الخيط الأبيض الأخر من داخل البكرة وبإستخدام الإبر مقاس 5.5 مللى هنبدأ بعمل 10 غرز على الإبرتين معا أيضا ثم هنسحب إبرة







_ هنشتغل كل السطور عدل وفى نفس الوقت هنزود غرزة من كل جانب فى كل السطور حتى يصبح عندنا 76 غرزة





_ الان هنضم البانتى الى الفستان بوضع البانتى خلف الفستان وبحيث يكون طرف الابرتين فى اتجاه واحد وبالخيط الابيض المتصل بالفستان وبالإبرة رقم 3.5 مللى هنقوم بشغل كل غرزة من الفستان مع الغرزة المقابلة لها من البانتى 2ع معا حتى اخر السطر





_ هنكمل شغل بالخيط الأبيض هنشتغل سطر مقلوب

_ وفى السطر التالى هنشتغل كالتالى لعمل فتحات الحزام = 6ع , لفه , 2ع معا , (8ع , لفه , 2ع معا ) هنكرر مابين الاقواس حتى اخر 6 غرز هنشتغلهم 6ع





_ هنشتغل سطر مقلوب وسطر عدل وسطر مقلوب بالخيط الأبيض

_ بالخيط الأزرق هنستمر بعمل غرزة الجيرسيه حتى يصل الطول من هنا الى 14 سم



_ هنبدأ نقفل من كل جانب لعمل حردة الإبط

هنقفل 3 غرز / مرة واحدة

ثم

غرزتين / مرتين

ثم

غرزة / مرتين







سيصبح عدد الغرز بعد جميع التقفيلات = 58 غرزة

_ هنستمر بشغل غرزة الجيرسيه لمده 12 سطر كمان

_ ثم فى السطر التالى هنقفل 22 غرزة فى المنتصف لعمل حردة الرقبة وهنكمل كل ناحية بخيط منفصل وسيتبقى لكل كتف 18 غرزة



_ هنشتغل سطر مقلوب ثم هنقفل الشغل

........

(ثانيا)

* الأمام *

_ مثل الظهر بالظبط ولكن بعد عمل التقفيلات لحرد الإبط هنستمر بشغل الجيرسيه لمدة 6 سطور ثم فى السطر التالى هنقفل 10 غرز فى المنتصف لحرد الرقبة ثم هنكمل كل ناحية بخيط منفصل وفى نفس الوقت هنكمل حرد الرقبة بقفل غرز من كل جانب من ناحية الرقبة كالتالى
3 غرز / مرة واحدة
ثم
غرزتين / مرة
ثم
غرزة/ مرة

هيتبقى لكل كتف 18 غرزة هنشتغل فوقهم 4 سطور جيرسيه ونقفل الشغل

(ثالثا)

* الأكمام *

_ هنبدأ بعمل 48 غرزة على الإبر مقاس 3.5 مللى

هنشتغل غرزة حافة , (2ع , 2م ) هنكرر مابين الأقواس وننهى السطر ب 2ع , غرزة حافة

_هنستمر بعمل البليسيه لمده 14 سطر



_ ثم هنبدأ نشتغل غرزة الجيرسيه وفى نفس الوقت هنبدأ نزود غرزة من كل جانب كل 10 سطور / 5 مرات

سيصبح عدد الغرز بعد جميع التزويدات = 58 غرزة



_ هنشتغل 10 سطور ثم فى السطر 11 هنبدأ نقفل من كل جانب لعمل قبة الكم كالتالى



3 غرز / مرة واحدة
ثم
غرزتين/ مرتين
ثم
غرزة / مرتين

_ ثم هنكمل شغل بدون تقفيل لمدة 4 سطور
_ ثم هنقفل من كل جانب
3غرز / مرتين
ثم
4 غرز / مرتين
ثم
هنقفل ال 12 غرزة المتبقيين

نيجى بقا لرسمة الجاكار Hello kitty أو القطة كيتى

الرسمة عبارة عن مربعات كل مربع بيمثل غرزة والألوان على حسب ذوقك طبعا أنا إستخدمت نفس الخيط الأبيض اللى مشغول منه الفستان وبالإضافة لخيوط كوتونبرليه بتاع التطريز ولكن علشان هيا رفيعه نسبيا فجوزت الخيط يعنى اشتغلت بفتلتين



الأول بدأت أطرز حدود القطة باللون الأسمر وهيا دى اللى محتاجه تركيز شوية وبعد كده الألوان اللى جوه الحدود سهله بدون ماتعدى











هنا صورت طريقة عمل غرزة التطريز واللى فيها بعمل غرزة نفس شكل الغرزة العدلة (حرف V )

بتخرجى الخيط من ورا لقدام من أسفل الغرزة حرف v



ثم بتدخلى الابرة فى الغرزة اللى فوقيها من تحت ضلعى الغرزة زى الصورة





ثم بتدخلى الخيط من قدام لورا فى نفس المكان اللى طلعتى منه الخيط



وهنا شكل الغرزة بعد ماخلصت (حرف V )



وهنكرر نفس الخطوات لعمل باقى الغرز



هنا الشكل النهائى بعد ما الصورة إكتملت





طبعا وماقدرتش اقوام هوايتى المفضلة وهيا التطريز بالخرز فطرزت الفيونكة بس بخرج النجف

(الحزام)

ابدائى ب6 غرز واشتغليهم كالتالى
*1ع,ضعى الخيط امام العمل,اسلتى غرزة كانك هتشتغليها مقلوب,رجعى الخيط خلف العمل*
كررى مابين الاقواسحتى نهاية السطر
لفى وكررى مابين الاقواس فى كل السطور
اقفلى الشغل عندما يصل طول الحبل تقريبا الى 150 سم تقريبا

...........

( التقفيل)

_ هنخيط الأكتاف وهنخيط جوانب الفستان
_ ثم هنخيط جوانب الأكمام وهنخيطها فى فتحة الكم
_ هنركب الحزام فى الفتحات اللى فى الوسط وهنعقد أطرافه



_ كمان هنركب زرارين صغيرين فى البانتى من تحت والعراوى هتبقا الغرز لان الغرز واسعه جدا لانها مشغولة على 5.5 مللى



...........

( برواز الرقبة )



لقط على طول دوران فتحة الرقبة باللون الأبيض 80 غرزة وإشتغلت بطريقة I-Cord كالتالى

أول حاجه هننشأ 3 غرزفى بدايه السطر اللى هنقفله بإستخدام أى طريقه من طرق البدايه



بعد كدا هنشتغل أول غرزتين عدل ونسلت التالته على السناره من غير ما نشتغلها




هنشتغل الغرزة التاليه عدل ودلوقتى أصبح عندنا على السناره 4 غرز




بإستخدام راس السناره الشمال هنمرر الغرزه المسلوته فوق اخر غرزه اشتغلناها ودلوقتى اصبح عندنا على السناره 3 غرز




هنسلت الثلاث غرز دول ونرجعهم على السناره اليمين



وهنكرر الخطوات السابقهالى ان يتبقى عندنا 3 غرز هنقطع الخيط ونمرره من خلال الثلاث غرز دول



ودى النتيجه



.............

وبحمد الله خلصت الفستان

أتمنى إنه يعجبكم وأتمنى الشرح والخطوات تكون واضحه