جاكيت تريكو بكابتشو للبيبى مشغول قطعه واحدة بغرزة الحبه بباترون عربى

بسم الله الرحمن الرحيم

جاكيت تريكو بكابتشو للبيبى مشغول قطعه واحدة بغرزة الحبه وضفيرة بسيطة بالباترون والشرح بالعربى

ده شكل الجاكيت



وهنا مجموعة من تطبيقات العضوات

المقاسات = 1/3شهر - 6/9شهر - 12/18شهر - 2 سنه - 3/4 سنوات

المقاسات النهائية للجاكيت:

محيط الصدر = 50_56_64_68_74 سم
طول الجاكيت الكلى = 27_29_33_37_40 سم

..........

المواد المستخدمة:

_ 250_300_300_350_350 جرام من الخيط
_ إبر تريكو دائرية مقاس 4 مللى (طولها 60 او 80 سم)
_ 4 - 4 - 5 - 5 -5 زراير خشبية
..........

قياس الوحدة = 10×10 سم = 21 غرزة × 28 سطر

..........

فى الصورة التالية توضح القياسات النهائية لأجزاء الجاكيت



كما يوضح الرسم السابق الباترونات المرسومة للضفيرة وغرزة الحبة وسوف اقوم بشرحها بالسطور قبل البدء فى شرح خطوات عمل الجاكيت

اولا (الباترون الاول)

السطر1(ظهر العمل)= 3ع,4م,3ع
السطر2= 3م,اسلتى غرزتين على كابل امام العمل,2ع,إشتغلى الغرز المسلوته 2عدل,3م
السطر3= زى الاول
السطر4= 3م,4ع,3م

.......

ثانيا (الباترون الثانى) باترون غرزة الحبة

السطر1 (وجه العمل)= 1ع,1م
السطر2= 1ع,1م
السطر3= 1م,1ع
السطر4= 1م,1ع

.......

ثالثا (الباترون الثالث)

السطر1(ظهر العمل)= 3ع,4م,3ع
السطر2= 3م,اسلتى غرزتين على كابل خلف العمل,2ع,إشتغلى الغرز المسلوته 2عدل,3م
السطر3= زى الاول
السطر4= 3م,4ع,3م

( فكرة عمل الجاكيت)

_ الجاكيت مشغول على الإبر الدائرية ولكن أمام وخلف العمل , وهو مشغول قطعه واحدة بداية من أسفل إلى الأعلى حتى نصل لحردة الإبط وعند هذه النقطة بنفصل الشغل فسنقوم بشغل الأمام اليمين والأمام اليسار والخلف منفصلين وفى نفس الوقت نقوم بإنشاء غرز جديدة من كل جانب لعمل الأكمام , وفى النهاية نقوم بخياطة أسفل الأكمام وأعلى الأكمام والكتفين .

..........

( خطوات عمل الجاكيت )

* أولا *

(جسم الجاكيت)

_ هنبدأ بعمل 117 _ 131 _ 145 _ 155 _ 169 غرزة ( بما فيهم 6 غرز لبرواز الزراير من كل جانب )
_ هنشتغل 6 سطور غرزة الطوق ( كل السطور عدل )
_ هنشتغل السطر السابع عدل أيضا وفى نفس الوقت فى هذا السطر هنزود غرزة من الغرزة 10 و11 بداية من المنتصف الأمامى ثم هنكرر هذا التزويد مرة أخرى فى نهاية السطر من الغرزة 10 و 11 قبل نهاية السطر ( بمعنى ككل هنزود 4 غرز فى السطر = غرزتين فى بداية السطر + غرزتين فى نهاية السطر )

بعد التزويد سيصبح عدد الغرز = 121 _ 135 _ 149 _ 159 _ 173 غرزة

_ هنضع علامتين لتحديد جوانب الجاكيت العلامة الأولى بعد 34 _ 38 _ 42 _ 44 _ 48 غرزة ثم هنضع علامة أخرى بعد 53 _ 59 _ 65 _ 71 _ 77 غرزة

لذلك أصبح تقسيم العمل كالتالى 34 _ 38 _ 42 _ 44 _ 48 غرزة للجزء الأمامى اليمين + 53 _ 59 _ 65 _ 71 _ 77 غرزة للظهر + 34 _ 38 _ 42 _ 44 _ 48 غرزة للجزء الأمامى الشمال

_ والأن هنشتغل السطر التالى ( ظهر العمل ) كما يلى :

6 غرزة طوق , ( الباترون الثالث فوق 10 غرز التاليين ) , ( الباترون الثانى فوق 89 _ 103 _ 117 _ 127 _ 141 غرزة التاليين ) , ( الباترون الأول فوق 10 غرز التاليين ) , 6 غرزة طوق

_ هنستمر بعمل الباترون هكذا وفى نفس الوقت هنبدأ بعمل فتحات الزراير فى برواز الزراير اليمين كالتالى :

* لعمل فتحة الزرار فى 6 غرز لبرواز الزراير اليمين هنقوم بشغل الغرزة 2 و3 عدل معا ثم هنعمل لفه وفى السطر التالى هنشتغل اللفه غرزة عدل

* هنعمل فتحات الزراير عندما يصل الطول إلى :

للمقاس 1/3 شهور : 4 _ 10 _ 16 _ 22 سم
للمقاس 6/9 شهور : 4 _ 11 _ 18 _ 24 سم
للمقاس 12/18 شهر : 3 _ 9 _ 15 _ 21 _ 27 سم
للمقاس 2 سنة : 3 _ 10 _ 17 _ 24 _ 31 سم
للمقاس 3/4 سنوات : 3 _ 11 _ 19 _ 27 _ 34 سم

_ هنستمر بعمل الباترون مع عمل فتحات الزراير فى البرواز اليمين حتى يصل الطول إلى 16_17_20_23_25 سم هنبدأ نفصل الشغل وهنشتغل كل جزء منفصل عن الأخر

..............

* ثانيا *

( الجزء الأمامى اليمين )

_ عدد الغرز = 34 _ 38 _ 42 _ 44 _ 48 غرزة

_ هنستمر بعمل الباترون كالسابق :

6 غرزة طوق , ( الباترون الثالث فوق 10 غرز التاليين ) , ( الباترون الثانى فوق 18 _ 22 _ 26 _ 28 _ 32 غرزة التاليين )

_ فى نفس الوقت لعمل الكم هنبدأ بإنشاء غرز جديدة فى نهاية كل سطر ناحية الجانب كالتالى :

4 غرز / 2_2_3_3_3 مرات
ثم
8 غرز / 1_1_1_1_3 مرات
ثم
10 غرز / 1_1_1_2_1 مرات
ثم
19 _ 22 _ 23 _ 23 _ 24 غرزة / مرة واحدة

سيصبح عدد الغرز بعد جميع التزويدات = 79_86_95_107_118 غرزة

( مع ملاحظة شغل الغرز المنشأة بالباترون الثانى أثناء التزويد )

_ بعد الإنتهاء من تزويد كل الغرز للكم هنستمر بالشغل كالتالى :

6 غرزة طوق , ( الباترون الثالث فوق 10 غرز التاليين ) , ( الباترون الثانى فوق 53 _ 60 _ 69 _ 81 _ 92 غرزة التاليين ) , ( 10 غرزة طوق لعمل إسورة الكم )

_ هنستمر بعمل هذا الباترون حتى يصل الطول إلى 23 _ 25 _ 28 _ 32 _ 35 سم مع مراعاة أن يكون اخر سطر مشغول وجه العمل

_ فى السطر التالى ( ظهر العمل ) هنقص غرزتين ( بعمل 2مقلوب معا ) مرتين فوق الأربع غرز الخاصين بالضفيرة
_ فى السطر التالى ( وجه العمل ) لعمل حردة الرقبة هنسلت 9_11_12_12_13 غرزة ناحية المنتصف الأمامى على ماسك الغرز ثم هنستمر فى قفل الغرز فى بداية كل سطر من ناحية الرقبة كالتالى :

غرزتين / مرتين
ثم
غرزة / 1_2_2_3_3 مرات

سيصبح عدد الغرز بعد التقفيل = 62_67_74_86_96 غرزة ( يمثلوا الكتف والكم )

_ هنستمر بعمل الباترون الثانى فوق كل الغرز المتبقيه مع عمل 10 غرز طوق ناحية إسورة الكم حتى يصل الطول الى 27_29_33_37_40 سم ثم هنقفل الشغل

...........

* ثالثا *

( الجزء الأمامى الشمال )

_ زى الجزء الأمامى اليمين ولكن معكوس

* رابعا *

( الظهر )

_ عدد الغرز = 53 _ 59 _ 65 _ 71 _ 77 غرزة

_ هنستمر بعمل الباترون الثانى فوق كل الغرز وفى نفس الوقت هنزود من كل جانب لعمل الأكمام كالتالى :

4 غرز / 2_2_3_3_3 مرات
ثم
8 غرز / 1_1_1_1_3 مرات
ثم
10 غرز / 1_1_1_2_1 مرات
ثم
19 _ 22 _ 23 _ 23 _ 24 غرزة / مرة واحدة

سيصبح عدد الغرز بعد جميع التزويدات = 143_155_171_197_217 غرزة

( مع ملاحظة شغل الغرز المنشأة بالباترون الثانى أثناء التزويد )

_ بعد إنشاء كل الغرز لعمل الأكمام سنستمر بالشغل كالتالى :

10 غرزة طوق , ( الباترون الثانى فوق 123 _ 135 _ 151 _ 177 _ 197 غرزة ) , 10 غرزة طوق

_ هنستمر هكذا حتى يصل الطول الى 25 _ 27 _ 31 _ 35 _ 38 سم هنبدأ بعمل حردة الرقبة الخلفية بقفل 17 _ 19 _ 21 _ 23 _ 23 غرزة فى المنتصف وهنكمل كل ناحية منفصلة .

_ فى السطر التالى هنقفل غرزة من كل جانب ناحية الرقبة

سيصبح عدد الغرز بعد التقفيل = 62 _ 67 _ 74 _ 86 _ 96 غرزة متبقية لكل ناحية (يمثلوا الكتف والكم)

_ هنقفل الشغل عندما يصل الطول الى 27_29_33_37_40 سم

..........

* خامسا *

( التقفيل )

_ هنخيط الأكتاف والأكمام من فوق ثم هنخيط الأكمام من أسفل الإبطين
_ هنركب الزراير فى مكانها على البرواز الشمال
_ هنثنى 5 سم من إسورة الكم للخارج وتثبيتها بغرزة خياطة

...........

* سادسا *

(الكابتشو )

_ هنلقط حوالى 55 إلى 75 غرزة حول دوران فتحة الرقبة ( بما فيهم الغرز المسلوته على ماسك الغرز من كل جانب )

_ هنشتغل سطر عدل من ظهر العمل
_ ثم هنشتغل سطر عدل من وجه العمل وفى نفس الوقت هنزود غرز بالتساوى على مدار السطر حتى يصبح عدد الغرز الكلى = 85 _ 89 _ 93 _ 97 _ 101 غرزة

_ هنشتغل الباترون الثانى فوق كل الغرز مع شغل 6 غرز طوق من كل ناحية وفى نفس الوقت هننشأ 6 غرز جديدة فى نهاية السطرين التاليين وهنشتغل الغرز الجديده أيضا بغرزة الطوق ( لعمل ثنية الكابتشو الأمامية )

سيصبح عدد الغرز بعد التزويد = 97 _ 101_105_109_113 غرزة

_ إذن هنستمر بعمل الباترون الثانى فوق كل الغرز مع شغل 12 غرزة طوق من كل ناحية

_ هنستمر هكذا حتى يصل طول الكابتشو الى 21_23_25_27_28 سم ثم هنقفل الشغل

_ هنثنى الكابتشو ونخيطه من الاعلى
_ هنثنى برواز الطوق للخارج وهنثبته من أسفل ناحية الرقبة بغرزتين خياطة

.............

وبكدا نكون إنتهينا بحمد الله من شرح الجاكيت

أتمنى لكم المتعه والفائدة

وتحت أمركم فى أى إستفسار

.............

لرؤية المزيد من باترونات التريكو العربية

باترونات التريكو

تسلمى ياقمر

تسلمى ياحبيبتى كلك ذوق والفضل والشكر لله وحده

ومتشوقة لرؤية ابداعاتك ان شاء الله

بالتوفيق