كعك العيد المصرى بالصور من مطبخى

بسم الله الرحمن الرحيم

النهارده هنحكى حكاية كعك العيد وهنعمله سوا إن شاء الله




كل عام وأنتم بخير
ذهب رمضان سريعاً وجاء العيد ليقضى بيننا أياماً معدودات ويرحل سريعاً
وكعادة المصريين دائماً لا يكون الإحتفال بأى مناسبة دينية إلا بالطعام والحلوى
وحكايتنا اليوم عن كعك العيد

ترجع أصول الكعك الى العصر الفرعونى وقد كانوا يصنعونه بأشكال مختلفه ونقشات متعدده تصل الى 100 شكل ونقش وجدت على مقبرة الوزير (( خميرع )) من الأسرة الثامنة وكانت تسمى ( القُرّص ) وربما جاءت من هنا عادة توزيع القرص عند المقابر فى الأعياد والمناسبات التى أطلقوا عليها إسم ( الرحمة )
أما كعك العيد ذاته فإنما يرجع الى العصر الفاطمى مثل معظم عادات الطعام فى المناسبات التى أدخلها الفاطميين الى مصر
وإن كانت الدولة الأخشيدية أسبق فى الإهتمام بكعك العيد حتى أن أحد الوزراء الأخشيد قام بصنع كعك حشاه بالدنانير الذهبية وأطلق عليه إسم ( إفطن له ) وتم تحريفه الى ( أنطونله ) وكان يقدم هذا الكعك للفقراء على مائدة ضخمة يصل طولها الى 200 م وعرضها الى 7 أمتار
ولكن إهتمام الفاطمين كان يفوق الحد حتى انهم خصصوا ديواناً حكومياً يختص فقط بكعك العيد أطلقوا عليه إسم ( دار الفطرة ) وخصصوا له ميزانيات ضخمة لصنعه وتوزيعه على الفقراء تصل الى 16 الف دينار ذهبياً
ورغم أن صلاح الدين حاول جاهداً القضاء على كل العادات الفاطمية إلا أنه فشل فى القضاء على عادة كعك العيد وباقى عادات الطعام التى ما زالت قائمة الى اليوم
وكان المماليك يهتمون أيضاً بكعك العيد ويقدمونه الى الفقراء والمتصوفين وكانوا يعتبرونه صدقة

ودلوقتى نيجى للمقادير والطريقه



المقادير...

كيلو دقيق
2باكو خميرة جافة
نصف كيلو سمن بلدى
3 ملعقة سمسم
نصف ملعقة ملح ناعم
كوب ونصف ماء دافىء للعجن
ملعقة صغيرة رائحة الكعك..ودى بتبقا عند بتوع العطاره

الطريقة.....


تخلط الخميرة مع نصف ملعقة سكر مع نصف كوب ماء دافىء وتترك لتتخمر

- ينخل الدقيق والملح والبهار او رائحة الكعك وينثر السمسم (يكون منقى طبعا) فوق الدقيق

- اعملى حفرة فى وسط الدقيق

- يقدح السمن ثم يصب فوق الدقيق ولكن بحذر ويقلب بواسطة ملعقة خشبية حتى يتجانس ويشرب الدقيق السمن

- ولما يبرد شوية نبدأ نقلب باليد ثم نفركه (نبسه)لمده نصف ساعة تقريبا

- يضاف الخميرة الى الدقيق وندعك باليد مع اضافة الماء تدريجيا ..ويستمر الدعك حتى تتكون عجينة متماسكة وناعمة

- نغطى العجين بقطعة قماش نظيفة ونتركه فى مكان دافىء ليتخمر...وحتعرفى انه اتخمر لما تلاقى حجمه زاد

- يقطع العجين على شكل كور فى حجم عين الجمل مع الدعك جيدا علشان تتجانس

-تساويها فى ايدك لو مش عندك قوالب كعك..بحيث تبقى مدورة على شكل الكعكة كده ..وتبدأى تنقشيها بالمنقاش..ولو مش عندك ..ممكن تستخدمى الشوكة



- ترص الوحدات فى صاج فرن وتغطيها لحد ماتختمر مرة ثانية ...وتلاقى حجمها اتضاعف




- تخبز فى فرن متوسط الحرارة مدة 25 الى 30 دقيقة ..وممكن اقل حسب ماتشوفى...لونه يبقى دهبى فاتح

- يبرد وبعد كده ترشيه بسكر بودره ....



اذا عايزة تحشيه ...

الحشو........

حشو العجوة...

حتحضرى نص كيلو عجوة (تمر) منزوعة النوى ومفرومة ...

ممكن تضيفى عليها نصف ملعقة سمسم ...وملعقتين زيت ..ونصف ملعقة صغيرة قرفة او حبهان مطحون ..(هال)

ويتعجنوا مع بعض ويشكل على هيئة كرات صغيرة

وانت بتدورى عجينة الكعك تعمل بها ثقب باصبعك وتحشى التمر وتروحى قافلة تانى ومكورة تانى

حشو المكسرات ...

حتحضرى المكسرات اللى انت عايزاه وليكن عين جمل مفروم او فستق مفروم خشن جدا
نصف كوب سكر
شوية ماء زهر
ويتخلطوا ببعض ..طبعا ماء الزهر يدينا رائحة فقط يعنى الاساس عندنا المكسرات

وممكن تاخدى عين جمل صحيح وتحشى به

حشو العجمية ....

كوب عسل نحل او ملبن

3 ملاعق كبيرة سمن بلدى

3 ملاعق كبيرة دقيق

2 ملعقة سمسم

3 ملاعق ماء دافىء

1 ملعقة ماء ورد

( وممكن تضيفى عين جمل اختيارى)

نحمر السمسم فى السمن لحد مايصفر ونضيف الدقيق ونحمر لحد مالونه يصفر ..نضيف العسل ونقلب باستمرار لحد ما يبدأ يغلى ثم نضيف الماء ونقلب لحد ماتبقى عجينة ...
نرفع من على النار ونسيبها تبرد ثم نضيف ماء الورد او ماء الزهر ..(ونضيف عين الجمل لو عايزين)...وبعد كده نكور قطع صغيرة مستديرة..

نحشى بها وحدات الكعك كما سبق ....ونبطط الكعك برضه ونرصه ونسيبه يخمر ثم نخبزه

وده بعد ماطلعناه من الفرن وبالهنا والشفا

يسلملى مرورك الغالى دريم وكل عام وانتم طيببون

يسلملى وجودك ام ياسمين

ومبارك عليكم رمضان ان شاء الله

اللهم بلغنا رمضان وارزقنا صيامه وقيامه

جزانا واياكى اختى الغاليه وعيد سعيد عليكى وعلى الامه الاسلاميه كلها

وبالهنا والشفا ياقمر

نورتى وشرفتى

يسلملى ذوقك ياقمر