بونشو كروشيه بوحدة مربعه غاية فى الروعه بالباترون والشرح بالعربى

بسم الله الرحمن الرحيم

بونشو كروشيه بوحدة مربعه غاية فى الروعه بالباترون والشرح بالعربى



.....

مقاس واحد

وفى الرسم التخطيطى التالى يوضح القياسات النهائية لأجزاء البونشو



.....

المواد المستخدمة :

_ 650 جرام من الخيط

_ إبرة كروشيه مقاس 8 مللى

......

قياس الوحدة = 10 × 10 سم = 10 غرز × 5 سطور

**فكرة البونشو عبارة عن 4 وحدات مربعه هنشتغل كل وحده منفصلة ثم هنشبك الوحدات معا ثم سنقوم بعمل برواز الرقبة و البرواز السفلى للبونشو وفى النهاية هنقوم بتركيب الشراشيب.

( الوحدة المربعة )



_ عبارة عن 10 سطور هنشتغلهم كالتالى :

هنبدأ بعمل 4 سلاسل وهنقفل الدائرة بعمل منزلقة فى أول سلسلة

السطر 1 = هنشتغل سلسلة إرتفاع , هنشتغل 8 غرزة حشو فى دائرة البداية , هنقفل السطر بعمل منزلقة فى أول غرزة حشو

السطر 2 = هنشتغل 3 سلاسل إرتفاع , ثم 3 سلاسل طائرة , ( غرزة عمود فى غرزة الحشو التالية , 3سلاسل طائرة ) هنشتغل مابين الأقواس 7 مرات وننهى السطر بعمل منزلقة فى ثالث سلسلة من سلاسل الإرتفاع

السطر 3 = هنشتغل سلسلة إرتفاع , ثم هنشتغل كالتالى فى كل فراغ أسفل كل 3 سلاسل من السطر السابق ( غرزة حشو , غرزة نصف عمود , 3 عماويد , غرزة نصف عمود , غرزة حشو ) وهنقفل السطر بعمل منزلقة فى سلسلة الإرتفاع

السطر 4 = سلسلة إرتفاع , 6 سلاسل طائرة , ( هنشتغل غرزة حشو فى الفراغ التالى , 6 سلاسل طائرة ) هنشتغل مابين الأقواس 7 مرات , وهننهى السطر بعمل منزلقة فى سلسلة الإرتفاع

السطر 5 = سلسلة إرتفاع , ثم هنشتغل كالتالى فى كل فراغ أسفل كل 6 سلاسل من السطر السابق ( غرزة حشو , غرزة نصف عمود , 5 عماويد , غرزة نصف عمود , غرزة حشو ) وهنقفل السطر بعمل منزلقة فى سلسلة الإرتفاع

السطر 6 = سلسلة إرتفاع , 9 سلاسل طائرة , ( هنشتغل غرزة حشو فى الفراغ التالى , 9 سلاسل طائرة ) هنشتغل مابين الأقواس 7 مرات , وهننهى السطر بعمل منزلقة فى سلسلة الإرتفاع

السطر 7 = سلسلة إرتفاع , ثم هنشتغل كالتالى فى كل فراغ أسفل كل 9 سلاسل من السطر السابق ( غرزة حشو , غرزة نصف عمود , غرزة عمود , 5 غرز عمود ثلاثى , غرزة عمود , غرزة نصف عمود , غرزة حشو ) وهنقفل السطر بعمل منزلقة فى سلسلة الإرتفاع

السطر 8 = هنشتغل منزلقة فوق أول 3 غرز , 3 سلاسل إرتفاع , ( 8 سلاسل طائرة , هنفوت 3 غرز عمود ثلاثى , هنشتغل غرزة عمود فى غرزة العمود الثلاثى التالية , 5سلاسل طائرة , غرزة حشو فى اول غرزة عمود ثلاثى فى المجموعه التالية , 5 سلاسل طائرة , هنفوت 3 غرز عمود ثلاثى , غرزة حشو فى أخر غرزة عمود ثلاثى فى نفس المجموعه , 5 سلاسل طائرة , غرزة عمود فى أول غرزة عمود ثلاثى فى المجموعه التالية ) هنشتغل مابين الأقواس 4 مرات وهننهى السطر بعمل منزلقة فى ثالث سلسلة إرتفاع

السطر 9 = هنشتغل غرزة منزلقة فى أول فراغ أسفل أول 8 سلاسل من السطر السابق , ثم ( 4 عماويد و 4 سلاسل طائرة و 4 عماويد فى الفراغ التالى , 4س و عمود و 4س فى الفراغ التالى , 4س و عمود و 4س فى الفراغ التالى , 4س و عمود و 4س فى الفراغ التالى , 4 سلاسل طائرة ) هنشتغل مابين الأقواس 4 مرات وهننهى السطر بعمل منزلقة فى أول غرزة عمود

السطر 10 = ( غرزة عمود فى كل غرزة من الأربع غرز التالية , ثم فى الفراغ التالى أسفل 4 سلاسل فى السطر السابق هنشتغل 3 عماويد و سلسلتين و 3 عماويد , ثم غرزة عمود فى كل غرزة من الأربع غرز التالية , ثم 4 عماويد فى كل فراغ من الأربع فراغات التالية ) هنشتغل مابين الأقواس 4 مرات وهننهى السطر بعمل منزلقة فى أول عمود

* الأن يوجد لدينا 30 عمود على كل جانب من المربع بالإضافه إلى سلسلتين فى كل ركن من أركان المربع , هنشتغل غرزة منزلقة حتى أول سلسلة فى أول ركن ثم هنكمل شغل كالتالى على طول جوانب المربع



السطر 1 =هنشتغل فى أول فراغ أسفل أول سلسلتين فى الركن هنشتغل 3 سلاسل إرتفاع و 2عمود و سلسلتين طائرتين و 3 عمود , ثم ( هنشتغل سلسلتين طائرتين , غرزة عمود فى الفراغ بين مجموعتى العماويد فى السطر السابق ) وهنكرر مابين الأقواس على طول جوانب المربع مع عمل 3 عمود وسلسلتين و 3 عمود فى كل فراغ أسفل كل سلسلتين فى الأركان وهنقفل السطر بمنزلقة فى ثالث سلسلة إرتفاع

السطر 2 = هنشتغل فى أول فراغ أسفل أول سلسلتين فى الركن هنشتغل 3 سلاسل إرتفاع و 2عمود و سلسلتين طائرتين و 3 عمود , ثم ( 3 عماويد فى الفراغ أسفل السلسلتين التاليتين ) وهنكرر مابين الأقواس على طول جوانب المربع مع عمل 3 عمود وسلسلتين و 3 عمود فى كل فراغ أسفل كل سلسلتين فى الأركان وهنقفل السطر بمنزلقة فى ثالث سلسلة إرتفاع

هنكرر السطر 1 و 2 حتى يصبح المربع تقريبا 38 × 38 سم

** ملاحظة : إذا أردتى تكبير البونشو هتستمرى بتكرير السطر 1 و 2 حتى تصلى للطول المرغوب

( تشبيك المربعات )

هنضع المربعات جنبا إلى جنب كما موضح فى الرسم التخطيطى التالى



ثم هنبدأ تشبيك كل مربعين مع بعض كالتالى أولا هنشبك المربع الأول وهو الموجود فى المنتصف أمام البونشو مع المربع الثانى على أحد جوانب البونشو بدئا من الركن السفلى حتى الركن العلوى فى منتصف البونشو ثم هنشبك المربع الأول مع المربع الثالث على الجانب الأخر من البونشو بدئا من أعلى من إلى أسفل

هنشتغل غرزة حشو فى الفراغ أسفل السلستين فى ركن المربع الأول , سلسلة طائرة , ثم هنشتغل غرزة حشو فى الفراغ أسفل السلستين فى ركن المربع الثانى , ( 3 سلاسل طائرة , غرزة حشو فى الفراغ بين مجموعتى العماويد فى المربع الأول , سلسلة طائرة , غرزة حشو فى الفراغ بين مجموعتى العماويد فى المربع الثانى ) هنكرر مابين الأقواس حتى الركن التالى هننهى بعمل 3 سلاسل للإنتقال للمربع التالى ثم هنكرر نفس طريقة التشبيك على هذا الجانب أيضا ونقطع الخيط

وهنكرر العمل فى ظهر البونشو

وهنا فيديو يوضح طريقة التشبيك

https://vimeo.com/11566604

,,,,,,,,,,,,,

( برواز الرقبة )

هنشتغل على طول دوران فتحة الرقبة السطرين التاليين

السطر 1 = 3 سلاسل إرتفاع ( هنشتغل سلسلتين طائرتين , غرزة عمود فى الفراغ بين مجموعتى العماويد فى السطر السابق ) وهنكرر مابين الأقواس وننهى السطر بعمل منزلقة فى ثالث سلسلة إرتفاع

السطر 2 = 3 سلاسل إرتفاع و 2 عماويد فى الفراغ أسفل السلسلتين التاليتين , ( 3 عماويد فى الفراغ أسفل السلسلتين التاليتين ) وهنكرر مابين الأقواس وننهى السطر بعمل منزلقة فى ثالث سلسلة إرتفاع

...........

( برواز أسفل البونشو )

هنشتغل على طول أسفل البونشو السطرين التاليين

السطر 1 =هنشتغل فى أول فراغ أسفل أول سلسلتين فى الركن فى أول مربع فى الأمام هنشتغل 3 سلاسل إرتفاع و 2عمود و سلسلتين طائرتين و 3 عمود , ثم ( هنشتغل سلسلتين طائرتين , غرزة عمود فى الفراغ بين مجموعتى العماويد فى السطر السابق ) وهنكرر مابين الأقواس على طول حافة البونشو مع عمل 3 عمود وسلسلتين و 3 عمود فى الركن فى أسفل المربع فى الظهر وهنقفل السطر بمنزلقة فى ثالث سلسلة إرتفاع

السطر 2 = هنشتغل فى أول فراغ أسفل أول سلسلتين فى الركن فى أول مربع فى الأمام هنشتغل 3 سلاسل إرتفاع و 2عمود و سلسلتين طائرتين و 3 عمود , ثم ( 3 عماويد فى الفراغ أسفل السلسلتين التاليتين ) وهنكرر مابين الأقواس على طول جوانب المربع مع عمل 3 عمود وسلسلتين و 3 عمود فى الركن فى أسفل المربع فى الظهر وهنقفل السطر بمنزلقة فى ثالث سلسلة إرتفاع

...........

( الشراشيب )

الشرابه الواحده عباره عن 6 خيوط طول كل خيط 40 سم

_ هنقوم بثنى الخيوط وهندخلها فى الفراغ بين كل مجموعتى عماويد ثم هنمرر طرف الخيوط داخل لفه الخيوط ونشد طرف الخيوط

وهنا فيديو يوضح طريقة عمل الشراشيب

https://vimeo.com/6268336

البونشو يجنن يسلم ذوقك لهلوبة.

يسلملى ذوقك حبيبتى
نورتى الموضوع