الباتية المورق بحشو العجوة و الجبنة من مطبخ مروة الشافعى بالصور

بسم الله الرحمن الرحيم

الباتية المورق بحشو العجوة و الجبنة من مطبخ مروة الشافعى بالصور









المقادير :
4 كبيات دقيق.
كباية و ربع لبن دافى.
ربع كباية زبدة سايحة.
3 معالق كبار زيت. .
بيضة.
معلقة كبيرة خميرة.
2 معلقة كبيرة سكر.
معلقة صغيرة ملح.



حطى السكر و الخميرة على الدقيق زى اى عجين بنعملوا....



حطى البيضة و الزيت على الزبدة السايحة و اضربيهم بالشوكة



حطيهم على الدقيق ..و اعجنى ..



هيبقى شكل الدقيق كدة زى الصورة

انزلى علية باللبن الدافى. .و اعجنى.



بعد ما اتلمت معاكى العجينة حطى الملح و اعجنى تانى. .



نزلى العجينة على الرخامة و اعجنى فيها كويس مش أقل من 10 دقايق. .. عوزنها طرية جدااا



حطيها فى بولة مدهونة زيت خفيف و غطيها و سبيها تخمر ساعة أو ساعة و نص لغاية ما يتضاعف حجمها.



عقبال ما العجينة تخمر هنحضر حشو العجوة طاسة على النار حطيت فيها
3 معالق كبار من العجوة .اشتريت العجوة من السوبرماركت. .. حطيت عليها 3 معالق كبار مية و سبت العجوة تسيح مع المية



و بعد كدة حطيت معلقة زبدة صغيرة و تقلبية و خلاص كدة تمام حشو العجوة بالطريقة دى ينفع فى أى حاجة. . كحك أو منين أو قراقيش أو قرص أو معمول هتكون تحفة و طرية و تجنن



خلص معجون العجوة

نرجع العجينة خلاص خمرت. . ادهنى الكونتر زبدة على زيت ...



انزلى بالعجينة و افرديها بأيدك على شكل مستطيل. .



لفيها رول



ادهنيها تانى زبدة و زيت ....



قسميها كور مقاس واحد و ادهنى الكور من فوق بردوا بخليط الزبدة مع الزيت علشان وشها مينشفش و يشقق. ..



هاتى كورة من العجين و خلى صوبعك فيها شوية زيت و افرديها. ...



كملى فرد بالنشابة.



ادهنى تانى



هنطبق العجين بقى كدة ...

و كمان كدة زى الصور هيبقى شبة المطبق. .



خلصت كمية العجين كلها بنفس الطريقة. ..



هاتى واحدة منهم و افرديها بالنشابة على شكل مستطيل ...



بعد الفرد قطعتها بالسكينة بالطول علشان تعملى 2 باتية



حطى بقى حشو العجوة



و ممكن تحشيها جبنة فيتا. أو أى حشو فى الدنيا ينفع. يعنى مثلا لحمة مفرومة أو فراخ أو تونة أو سبانخ بالجبنة أو مربى أو شيكولاتة اى حاجة هتنفع



لفى بقى العجين كدة رول زى الصورة و خلى بالك كل ما العجين يكون رقيق هيخلى الباتية مورق و يجنن

خلصت الكمية كلها رصيها فى صينية الفرن و سبيها تخمر تانى تقريبا نص ساعة و بعد كدة حضرى طبق فية بيضة و عليها معلقة لبن و نقطتين من الخل و اضربيهم علشان ندهن بيهم وش الباتية .. الخل هيضيع الزفارة من البيض



ادهنى الباتية بالبيض و رشى بقى عليهم سمسم أو حبة البركة أو جبنة مبشورة مثلا



فى فرن سخن على درجة 180 دخلى الصوانى تقريبا 25 دقيقة فى الرف الفى النص و تبعية اول ما تلاقى الباتية من تحت اخد لون يبقى استوى افتحى علية الشواية من فوق علشان ياخد لون خفيف .



خلاص الله اول ما يطلع بقى رشى علية مية ببخاخ أو بأطراف صوبعك على الباتية كلوا و غطية بفوطة نظيفة 10 دقايق بس.



يجنن أحلى طريقة للباتية رهيب و بنفس العجينة دى اعملى أحلى كرواسون مورق خطير