التريكو ببساطه معناه هوا عمل قطعه من القماش عن طريق عمل حلقات متداخلة من الخيط وهناك طريقتين لعمل هذه الحلقات وهما الغرزة العدلة والغرزة المقلوبه
النهارده بإذن الله هنبدأ الدرس التانى بعد ماعرفنا إزاى نبدأ سطر من التريكو هنشرح النهاردة إزاى نعمل الغرزتين الأساسيتين فى شغل التريكو وهما الغرزة العدلة والغرزة المقلوبة
قبل مانبدأ شرحنا هنبص على الرسمه دى هنلاقى إن الغرز الملفوفة على الابرة عبارة عن حلقة من الخيط حول الابرة لهذه الحلقة جانبين جانب امامى (front loop) اللى انتى شايفاه على الابرة امامك وجانب خلفى من الظهر خلف الابرة (back loop)
فاحنا ممكن نعمل غرزة عدلة فى الجانب الامامى وغرزة عدلة فى الجانب الخلفى وايضا الغرزة المقلوبه ممكن نعملها فى الجانب الامامى وممكن فى الجانب الخلفى وهنوضح ازاى خلال الدرس ولكن شغلنا الاساسى لحياكة التريكو بيكون باستخدام الجانب الامامى دائما الا اذا الباترون طلب غير كدا
ولازم نركز كويس قوى فى شكل الحلقة او الغرزة وتكوينها التشريحى عشان نعرف الابرة هتدخل منين وتطلع منين عشان نكون الغرزة
والجانب الامامى هذا له جهة يمين وجهة شمال والجانب الخلفى كذلك له جهة يمين وجهة شمال كما يوضح الرسم التالى
عموما التريكو معتمد اساسا على غرزتين
الغرزة العدلة Knit stitch وتسمى أيضا Garter stitch
الغرزة المقلوبه Purl stitch
لو ادخلتى الابرة اللى بيدك اليمين داخل غرزة البداية من الامام جهة الشمال والخيط المتصل بالبكرة خلف الابرة تبقى عملتى الغرزة العدلة ولو ادخلتى الابرة من الامام جهة اليمين والخيط المتصل بالبكرة امام الابرة يبقى بتعملى الغرزة المقلوبة كما بالصورتين
عنوان المشاركة: Re: **دورة تعلم التريكو **الدرس التانى الغرزة العدلة والمقلو
مرسل: الأحد مايو 09, 2010 6:16 pm
مراقب عام
اشترك في: الاثنين إبريل 05, 2010 7:23 pm
مشاركات: 13047
مكان: المنصورة
خلال الدرس هشرح الغرزة العدلة والمقلوبة فى front loop او اللفة الامامية للغرزة ثم فى نهاية الدرس هوضح الفرق بين العمل فى اللفة الامامية واللفة الخلفية
الغرزة العدلة وإختصارها فى الباترون=K (Knit stitch)
دى الغرزة الأساسية فى شغل التريكو وعشان كدا سمى شغل التريكو بإسمها. بمجرد إنك تتعلمى الغرزة العدلة والغرزة المقلوبة يبقا قطعتى نصف الطريق فى شغل التريكو .
هناك طريقتين فى عمل الغرزة العدلة
أولا الطريقة الإنجليزية أو الأمريكية (The American OR English method)
فى الطريقة دى بنمسك الخيط باليد اليمين
ودى طريقة شرحها بالصور
هنمسك السنارة اللى عليها الغرز باليد الشمال والسنارة اللى هنشتغل بيها باليد اليمين ونمسك الخيط باليد اليمين ونلفه على اصبع السبابه كما فى الصورة هندخل السنارة اليمين فى الجهه الشمال للغرزة ومن تحت السنارة الشمال
هنلف الخيط على السنارة اليمين مع عقارب الساعة
ونسحب الخيط الملفوف حول الابرة اليمين من تحت السنارة الشمال ومن خلال الغرزة باستخدام الابرة اليمين
هنسلت الغرزة المشغولة من على السنارة الشمال وبكدا اصبح عندنا غرزة عدلة على السنارة اليمين
أنظرى أيضا الرسم التوضيحى للغرزة العدلة بالطريقة الإنجليزية
هنكرر الخطوات السابقه حتى ننتهى من جميع الغرز على السطر وبكدا نكون اشتغلنا اول سطر ولعمل سطر جديد هنبدل الابر او هنلف العمل بمعنى ان دائما الابرة اللى عليها الغرز تكون فى اليد اليسرى والابرة اللى هنشتغل بيها الفاضيه تبقا فى اليد اليسرى
وللتذكرة فقط بنقول ان عمل غرزة عدلة يتطلب 4 خطوات 1/ندخل الابرة 2/نلف الخيط 3/نسحب اللفة خلال الغرزة 4/نسلت الغرزة القديمه من على السنارة
و بعد عمل كذا سطر من الغرزة العدلة ده هيبقا شكل الغرزة العدلة من أمام وخلف العمل والعمل المكون من كل السطور عدل يسمى غرزة الطوق (garter stitch) وتتميز الغرزة دى بالثبات والمطاطية وكمان مابتبرمش عشان كدا دائما بتستخدم غرزة الطوق لعمل براويز او الاطراف زى مثلا برواز الزراير فى الجواكت او البلوفرات
ثانيا الطريقة الأوروبية
فى الطريقة دى بنمسك الخيط باليد الشمال
ودى طريقة شرحها بالصور
هنمسك السنارة اللى عليها الغرز باليد الشمال والسنارة اللى هنشتغل بيها باليد اليمين ونمسك الخيط باليد الشمال هندخل السنارة اليمين فى الغرزة من الناحية الشمال
هنلف الخيط على السنارة اليمين مع عقارب الساعة
بإستخدام السنارة اليمين هنسحب الخيط داخل الغرزة
هنسلت الغرزة المشغولة من على السنارة الشمال ليصبح عندنا غرزة عدلة على السنارة اليمين
نلاحظ ن الطريقتين متشابهين جدا بإختلاف مسكة الخيط باليد اليمين أو الشمال وإنتى حسب ماترتاحى فى الشغل إختارى الطريقة المناسبة ليكى
عنوان المشاركة: Re: **دورة تعلم التريكو **الدرس التانى الغرزة العدلة والمقلو
مرسل: الأحد مايو 09, 2010 6:43 pm
مراقب عام
اشترك في: الاثنين إبريل 05, 2010 7:23 pm
مشاركات: 13047
مكان: المنصورة
الغرزة المقلوبة (Purl stitch) وإختصارها فى الباترونات =P
هناك أيضا طريقتين للغرزة المقلوبة
الأولى الإنجليزية أو الأمريكية (The American OR English method)
وفيها برضه بنمسك الخيط باليد اليمين
وده الشرح بالصور
هنمسك السنارة اللى عليها الغرز باليد الشمال والسنارة اللى هنشتغل بيها باليد اليمين ونمسك الخيط باليد اليمين ونلفه حول السبابه كما بالصورة هندخل السنارة اليمين فى الجهه اليمين للغرزة ومن فوق السنارة الشمال
هنلف الخيط حول السنارة اليمين عكس عقارب الساعة
ونسحب الخيط الملفوف حول الابرة اليمين من فوق السنارة الشمال ومن خلال الغرزة باستخدام الابرة اليمين
هنسلت الغرزة المشغولة من على السنارة الشمال ليصبح عندنا غرزة مقلوبة على السنارة اليمين
أنظرى أيضا للرسم التوضيحى للغرزة المقلوبة بالطريقة الإنجليزية
لو اشتغلنا سطر عدل وسطر مقلوب هتبقا النتيجة عندنا غرزة بنسميها غرزة القماشه(stockinette stitch)ودى هنشرحها بالتفصيل مع باقى الغرز ان شاء الله ولكن حبيت اذكرها فى الدرس ده ولاحظى وش الشغل واللى بيسمى (right side)واختصاره دائما فى الباترونات المكتوبه RS واحيانا تسمى knit side ودى بتظهر فيها الغرز على شكل حرف V اما ظهر الشغل واللى بيسمى( wrong side ) واختصاره دائما فى الباترونات المكتوبه WS واحيانا تسمى purl side ودى بتظهر فيها الغرز زى الاقواس اللى عكس بعض والصورة توضح اكثر
الطريقة التانية الطريقة الأوروبية (Continental method)
وفى الطريقة دى بنمسك الخيط باليد الشمال
وده شرحها بالصور
هنمسك السنارة اللى عليها الغرز باليد الشمال والسنارة اللى هنشتغل بيها باليد اليمين ونمسك الخيط باليد الشمال هندخل السنارة اليمين فى الغرزة من الناحية اليمين
هنلف الخيط على السنارة اليمين عكس عقارب الساعة
بإستخدام السنارة اليمين هنسحب الخيط داخل الغرزة
هنسلت الغرزة المشغولة من على السنارة الشمال ليصبح عندنا غرزة عدلة على السنارة اليمين
................
فاضل بس فى هذا الدرس اننا نفرق بين الشغل فى اللفة الامامية (front loop)والشغل فى اللفة الخلفية(back loop)
الغرزة العدلة فى front loop هندخل الابرة اليمين فى اللفة الامامية للغرزة من الناحيه الشمال وتحت السنارة الشمال
الغرزة العدلة فى back loop هندخل الابرة اليمين فى اللفة الخلفية للغرزة من الناحيه اليمين وتحت السنارة الشمال
الغرزة المقلوبة فى front loop هندخل الابرة اليمين فى اللفة الامامية للغرزة من الناحيه اليمين وفوق السنارة الشمال
الغرزة المقلوبة فى back loop هندخل الابرة اليمين فى اللفة الخلفية للغرزة من الناحيه الشمال وفوق السنارة الشمال
وبكدا نبقا خلصنا شرح الغرزة العدلة والمقلوبة أتمنى أن تستفيدوا من الدرس وإنتظرونى فى درس أخر لنكمل دورة تعلم التريكو
لا تستطيع كتابة مواضيع جديدة في هذا المنتدى لا تستطيع كتابة ردود في هذا المنتدى لا تستطيع تعديل مشاركاتك في هذا المنتدى لا تستطيع حذف مشاركاتك في هذا المنتدى لا تستطيع إرفاق ملف في هذا المنتدى
تحية لكم