تفصيل فست سواريه من بوردا (تطبيقى مع الشرح)

فست سواريه/خياطه فستان سواريه/تفصيل فستان سهره/باترون فستان سهره/فستان سهره للحوامل


بسم الله الرحمن الرحيم

طبعا كنت وعدتكوا انزل تطبيقى على الفستان اللى ترجمته من بوردا

ده شكل الفستان الاصلى



وهنا ترجمة الفستان بالكامل مع باترونه

فستان بحمالات وكشكشة من تحت الصدر بالباترون والشرح من بوردا

طبعا انا الحمد لله عشان حامل وكان عندى مناسبه وهيا فرح اخويا مكنتش عارفه البس ايه فى الفرح خصوصا ان نادرا اما يكون فيه حاجه سواريه للحوامل

ففكرت افصل فست واطرزه

وعلى فكره الفست او التونك ده ينفع للحامل وغير الحامل يعنى انا اخترت تفصيله تنفع فى الحالتين بحيث ان الفست مايتركنش بعد كدا

قعدت ادور على موديل فى بوردا اطبق عليه لاقيت الموديل ده بس عملت عليه تعديل بسيط خالص

ده كان شكل الموديل اللى فى بوردا



وده شكل الموديل بعد التعديل اللى عملته



طبعا انا اخذت الجزء العلوى من الموديل فقط
اما الجزء السفلى فجبت قماشه متر×متر



وتنيتها بالورب على شكل مثلث زى ما وضحت فى الرسم التخطيطى التالى



وفتحت فتحه فى منتصف المثلث عشان الوسط زى ما فى الصورة فوق وركبتها على الجزء العلوى فاصبح بالشكل ده



...........

يتبع ان شاء الله

نيجى دلوقتى لطريقة العمل

اول حاجه الباترون

بالنسبه للجزء السفلى مش محتاج باترون لانى زى ماشرحت جبت قماشه متر×متر وتنيتها بالورب على شكل مثلث وهركبها فى الجزء العلوى

اما بالنسبه للجزء العلوى وباترونه الموجود فى بوردا

شوفوا الاول قطع الباترون دى



الجزء العلوى عبارة عن القطع 1,2,3,4

طبعا انا طبعت صفحات الباترون وبعد ماطبعتها هحتاج اجمعهم عشان يبقوا صفحه واحده واقدر اشف قطع الباترون من عليها

دى صفحه من صفحات الباترون



هقص الزياده اللى فى الجانب السفلى



وهقص الزياده اللى فى الجانب الايمن



وعمل كدا فى كل الصفحات هقص الزيادات فى الجانب السفلى وفى الجانب الايمن

وهبدأ ألزق الصفحات جنب بعضها





الى ان انتهى من لصق كل الصفحات واحصل على صفحة الباترون كاملة





ولنقل قطع الباترون فى طريقه سهله وبسيطه هجيب ورق جرنال وورق كاربون



واضع ورق الكاربون فوق ورق الجرنال واضع صفحة الباترون فوقهم



وهبدأ ارسم قطع الباترون باستخدام القلم (يفضل قلم الوان عشان اعرف رسمت ايه ومارسمتش ايه) ولوفيه خطوط مستقيمه هرسمها بالمسطرة

وطبعا مهم جدا انقل الاسهم والارقام المصغرة والعلامات الى القطع بتاعتى



بعد ماهشف القطع هقص الزيادات حتى احصل على القطع فى شكلها المظبوط

دى القطعة رقم 1 (الصدر)



دى القطعة رقم 2 (بطانه الصدر)



دى القطعة رقم 3 (الظهر وبطانه الظهر)





والقطعه رقم 4 الحمالات بس نسيت اصورها

دلوقتى هنحتاج اننا ننقل قطع الباترون دى على القماش بتاعنا

انا إشتريت قماش ستان إسترتش ساده للجزء العلوى (متر)

وإشتريت قماش شيفون سواريه منقوش للجزء السفلى (متر)

هنحتاج لدبابيس مكتب وماركه (انا بفضل طباشير طبى عشان اعرف اطبعه)



...................

يتبع ان شاء الله

هنثنى القماش مجوز على ظهره

هنبدأ بتدبيس قطع الباترون على القماش بإستخدام دبابيس المكتب



وناخد بالنا من الاسهم الموجوده على القطع لازم تكون موازيه لاتجاه القماش



ونقص القماش مع ملاحظه اننا هنترك حوالى 2.5 سم زيادة عشان الوصلات



وده شكل القطعه بعد القص



هنحدد شكل القطعه بإستخدام الطباشير



ونشيل الجرنال بحذر



طبعا كل قطعه هتبقا مجوز يمين وشمال
عشان ننقل التحديد للقطعه التانيه هنقلب القطعه على وشها بحيث ان ظهر القطعتين يكون مقابلين لبعضهم



وهنضغط على القطعه من الخارج باليد



هنلاقى ان التحديد اللى بالطباشير اتنقل للقطعه الاخرى



وهنعمل كدا فى كل قطع الباترون

..............

يتبع ان شاء الله

نيجى بقا للخياطه

هنقفل البنس الموجوده فى بطانه الصدر

وهنخيط الحمالات فى البطانه بتاعتها ثم نقلبها

هنخيط الصدر فى الحمالات مع عمل الكشكشة

ثم نخيط الصدر فى بطانه الصدر من فوق ومن الجوانب





عشان نخيط الظهر والبطانه بتاعته فى الحمالات هنركبها بالشكل التالى



وده شكل من قريب ونسرجها





ثم نخيطها على الماكينه







وهنقص الزياده من الحمالات من الداخل عشان ماتكلكعش



ونقلبها هتبقا بالشكل ده





وهنخيط جوانب الصدر مع الظهر

ثم نخيط الجزء السفلى للفست بالجزء العلوى





طبعا لو فيه خياطات داخليه هنسرفلها وفى هذا الموديل مافيش اى خياطات داخليه

وده الشكل النهائى



...........

يتبع ان شاء الله

وده الشكل النهائى للفست









وجبتله بودى كارينا نفس اللون



هنا يوجد شرح وتفصيل بنطلون حمل فصلته لنفس الطقم

تفصيل بنطلون حمل بالباترون والشرح من بوردا مع تطبيقى


وبعد كدا ننتقل الى التطريز

وده لينك تطريز الطقم بالخرز

تطريز فست وبودى وطرحه بالخرز والكرستالات من اعمالى

انتظرونى

اترككم فى رعاية الله

جزانا واياكى ونورتى الموضوع

تسلميلى ويسلملى ذوقك

يسلملى ذوقك ومرورك الغالى